Oqý-aǵartý mınıstri Ǵanı Beısembaev sýǵa batqan balany qutqaryp qalǵan Aqtóbe qalasyndaǵy №13 mekteptiń oqýshysy Qolqanat Baqquldy marapattady.
Oqys oqıǵa 1 maýsym kúni bolǵan. Qolqanat Elek ózenine batyp bara jatqan balany qutqaryp, alǵashqy medısınalyq kómek kórsetip, aman alyp qaldy. Mınıstr batyr oqýshy men ony tárbıelegen ata-anasyna alǵys bildirdi.
– Adamdy ajaldan qutqarý – úlken erlik. Mektep oqýshylarynyń arasynda ózgelerge úlgi bolarlyq ójet, erjúrek, batyl balalardyń baryn maqtan etemiz. Osyndaı azamattardy tárbıelegeni úshin ata-analary men muǵalimderine alǵys aıtamyn, – dedi Ǵ.Beısembaev.
Qolqanattyń ata-anasy da balasynyń erligin eskerýsiz qaldyrmaǵan mınıstrge rızashylyǵyn bildirdi.
– Balalarymyzdyń qaıyrymdy, qamqor, patrıot bolyp ósýine kúsh saldyq. Rýhy bıik urpaq tárbıeleýge tyrystyq, ulymyzdyń bul áreketin maqtan tutamyz, – dedi oqýshynyń ákesi Erbolat Rzıev.
Pedagogterdiń aıtýynsha, Qolqanat – mekteptegi úzdik oqýshylardyń biri. «Qazaqstan tarıhy» páni men shet tilderine qyzyǵýshylyǵy basym. Sonymen qatar mekteptiń voleıbol komandasynyń quramynda oınaıdy.
Eske sala keteıik, bıyl sáýir aıynda Oqý-aǵartý mınıstri Atyraý, Qaraǵandy, Qyzylorda, Soltústik Qazaqstan jáne Túrkistan oblystarynan kelgen 11 oqýshyny erligi úshin marapattap, ata-analaryna alǵys bildirgen bolatyn. Mundaı is-shara dástúrli túrde jalǵasady.
Kúnnur BOLATBEK,
L.N.Gýmılev atyndaǵy
EUÝ stýdenti