Memleket basshysy Qasym-Jomart Toqaev Sheteldik ınvestorlar keńesiniń 35-plenarlyq otyrysyna qatysýshylarǵa iltıpat bildire otyryp, jıynnyń Astana halyqaralyq forýmymen tuspa-tus kelip otyrǵanyn ári bıyl Sheteldik ınvestorlar keńesiniń qurylǵanyna 25 jyl tolǵanyn atap ótti.
Kún tártibinde talqylanǵan másele – ekonomıkanyń sıfrlyq transformasııasy. Prezıdent geosaıası shıelenis pen proteksıonızmniń qarqyn alýy álemdik ekonomıkany ózgeriske ushyratyp jatqanyn atap ótip, kez kelgen daǵdarys jańa múmkindikterge jol ashatynyna nazar aýdardy.
– Orasan zor tehnologııalyq serpin beretin «sıfrlandyrý» osyndaı múmkindiktiń biri dep sanaımyz. Sıfrlandyrý qarqyny ekonomıkanyń damýyna zor yqpal etip, búgingi kún tártibiniń baǵyt-baǵdaryn aıqyndap berdi. Jasandy ıntellekt, blokcheın, Internet zattar (IoT) jáne Úlken derekter (Big Data) sekildi jańa tujyrymdar men tehnologııalardy keń kólemde engizý aýyl sharýashylyǵynan bastap qarjy salasyna deıin barlyq saladaǵy oıyn erejesiniń ózgerýine alyp keledi. Sıfrlandyrý tutas elder men óńirlerdiń básekege qabilettiligin anyqtaýshy faktorǵa aınaldy. 2025 jylǵa qaraı álemdegi sıfrlyq naryq 50 paıyzǵa artyp, 6,8 trıllıon dollarǵa jetedi dep boljanyp otyr. Boljam boıynsha 10 jylda álemdegi taýar óndirisi men kórsetiletin qyzmetterdiń 70 paıyzynda sıfrlyq tehnologııalar qoldanylady. Bul úrdistiń Qazaqstan úshin asa mańyzdy ekenin anyq túsinemiz. Taıaýda álemdegi 62 el Ortalyq Azııanyń ornyqty damýy úshin Qazaqstanda Birikken Ulttar Uıymynyń sıfrlyq sheshimder ortalyǵyn qurý týraly bastamasyn biraýyzdan qoldady. Muny bizge artylǵan zor senim jáne Qazaqstannyń álemdik arenaǵa shyǵýdaǵy mańyzdy kezeńi retinde qabyldaımyz, – dedi Memleket basshysy.
Prezıdent, Sıfrlyq ıntellekt ındeksine (Digital IQ) sáıkes Qazaqstan sıfrlandyrý qarqyny boıynsha 20-orynda ekenin jáne sıfrlyq ortany damytý turǵysynan perspektıvti elderdiń qataryna kiretinin aıtty.
– 2022 jyly elimizdegi sıfrlandyrý salasy 12 paıyzǵa ósti. Otandyq sıfrlyq ónimderdiń halyqaralyq naryqtaǵy básekege qabilettiligi artyp keledi. Byltyr IT ónimderi men qyzmetter eksporty 5 ese ulǵaıyp, 333 mıllıon dollardy qurady. Maqsatymyz – 2025 jylǵa qaraı bul kórsetkishti 500 mıllıon dollarǵa deıin jetkizý. Degenmen biz odan ári ilgerileı berýge nıettimiz, – dedi Qasym-Jomart Toqaev.
Sonymen qatar Sheteldik ınvestorlar keńesiniń otyrysynda Eýropalyq qaıta qurý jáne damý bankiniń prezıdenti Odıl Reno-Basso, Premer-mınıstrdiń orynbasary – Syrtqy ister mınıstri Murat Nurtileý, Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, «Qazaqstannyń sheteldik ınvestorlar keńesi» qaýymdastyǵynyń basqarma tóraǵasy Erlan Dosymbekov, Azııa damý bankiniń prezıdenti Masatsýgý Asakava, CNPC kompanııasynyń prezıdenti Hoý Szıszıýn, «Shell plc» kompanııasynyń bas atqarýshy dırektory Ýael Saýan, «Chevron» korporasııasynyń atqarýshy vıse-prezıdenti Naıdjel Hırn, «Philip Morris International» kompanııasynyń TMD jáne Ortalyq Azııa boıynsha prezıdenti Marko Marıottı, «LÝKOIL» kompanııasynyń bas atqarýshy dırektory Vadım Vorobev, «Ernst&Young» kompanııasynyń Eýropa, Taıaý Shyǵys jáne Afrıka aımaqtary boıynsha basqarýshy seriktesi Djýlı Lınn Tıgland, «Air Liquide» kompanııasynyń bas atqarýshy dırektory Fransýa Jakov, «Baker Hughes» kompanııasynyń tóraǵasy jáne bas atqarýshy dırektory Lorenso Sımonellı, «Microsoft» korporasııasynyń Ortalyq jáne Shyǵys Eýropa bólimshesiniń bas dırektory Mıshel Sımmons, «Wabtec» korporasııasynyń prezıdenti jáne bas atqarýshy dırektory Rafael Santana sóz sóıledi.