Sýretshi qylqalamy arqyly artynda búkil tarıhty qaldyryp ketedi desek artyq emes. Sýrettegi myń san boıaýdyń astarynda tarıhtyń talaı jyldary sóılep jatady. Keıde sýretterge qarap tursań, buryn óken ǵasyrǵa baryp kelgendeı áser alasyń. Bul, sirá sýretshiniń talantynan bolsa kerek. Árbir sóz sekildi, árbir boıaýdyń da óz maǵynasy, tereń fılosofııasy bar. Biz bir oıdy dál jetkizý úshin sózdi qalaı izdeıtin bolsaq, boıaýdy da dál taba alý - naǵyz sheberlik.
Osy salada 45 jyl eńbek etken Alpysbaı Qazyǵulov: «Jaratýshynyń qoldaýy bolmasa, sýret óneri eshqashan shyqpaıdy», deıdi.
Kez-kelgen sýret uly týyndyǵa aınala almaıdy. Kórkem jumystyń syrtqy pishini ǵana kóz tartarlyq kórkem bolýy azdyq etedi. Onyń ishki mazmuny da kórermenge kóp oı salýy shart. Sýrettiń jany, tili bolady. Keıde sondaı týyndylardy kórip tamsanǵanda «ol qalaı týady eken?» degen suraq kókeıimizde turady.
Aqyn-jazýshylardyń «sózderdi bireý qulaǵyma kelip aıtyp ketti» degenindeı sýretshige de áldebir qudiret sybyrlaı ma eken?
«Jakloı Davıd - fransýzdardyń eń uly sýretshileriniń biri. «Koronasııa Napaleon» degen kartınasyn jazǵan kezde birden ımperııadaǵy birinshi sýretshige aınaldy. Qazir bul sýret Lývrda tur. Onyń kólemi - 6h10 m. Ishinde 156 keıipker salynǵan. Men ony kórgen kezde bundaı kartınany sýretshi Allanyń kómeginsiz sala almaıdy degen tujyrymǵa keldim. Ondaı aýqymdy kartınany bir adamnyń jınaqtap, jazyp shyǵýy múmkin emes dep oılaımyn. Sondyqtan, jaratýshynyń qoldaýy bolmasa bul sýret óneri eshqashan shyqpaıtyn edi», deıdi sýretshi.
Talant ıesi sýret ónerine «halyqtyń ıntelektýaldyq baılyǵy» degen baǵa beredi.
«Qazaq sýret óneri bıyl 90 jylǵa toldy. Bul qazaqta kenje óner. Sondyqtan qazaqtyń aıtqanynan aıtatynyny kóp dep oılaımyn. Meniń de qosatyn úlesim áli alda. Basqa elderde kórkem sýret óneri 700-800 jyldan beri damyp kele jatyr. Bizge nábári - 90 jyl. Sondyqtan qazaq qoǵamy sýret ónerin túsinýden alshaqtaý. Tolyq túsinýge jete qoıǵan joq. Men ózim bir tájirıbe jasap kórdim. Sonda 10 taksı júrgizýshisin toqtatyp, suraǵanymda bireýi de Qasteev mýzeıi qaı jerde ornalasqanyn bilmeıtin bolyp shyqty. Osydan-aq halyqtyń mýzeıge barmaıtynyn ańǵarýǵa bolady. Dese de túsinetinderi de bar. Kóptegen kolleksıonerler de bar. Men ózim de 40 jyl boıy qazaq sýretshileriniń týyndylaryn jınap kelemin. Meniń toptamamda olardyń 3 000-ǵa jýyq kartınasy bar. Onyń ishinde úsheýi - Ábilhan Qasteev atamyzdyń kartınasy. Qalǵandary da qazaqtyń beldi sýretshileriniń týyndysy. Men olardy halyqtyń murasy ǵoı dep jınap júrmin», deıdi Alpysbaı Qazyǵulov.
Taǵdyrly óleńder bolatyny sekildi, taǵdyrly kartınalar da bolady.
«Myna kartınany men 4 kýrsta, stýdent bolǵan shaǵymda salǵanmyn. Buǵan 2 kýrs tómen oqıtyn jigit sebepshi boldy. Ol osy sýrettiń jantysyn sala almaı otyr eken. О́zi únemi shákirtaqydan qaǵylyp qalatyn. Sosyn men oǵan «saǵan salyp bereıin, shákirtaqyńdy al» dep, sol sýrettiń jartysyn salyp bergenmin. Keıin ol emtıhanǵa alyp barǵanda muǵalimder: «bizdiń ınstıtýtta buny tek bir-aq adam sala alady», depti. Meni dekanatqa shaqyryp, urysqan edi. Jumysty óziń al dedi de ana balaǵa 4 qoıyp berdi. Sodan keıin kartınany taǵy tolyqtyryp saldym. Biraq keıin ony bireý urlap ketti. Artynsha ony qaıta salyp shyqtym. Bul kartınanyń tarıhy osyndaı», dedi ol.
Ár týyndysynan qoltańbasy kórinip turatyn talantty sýretshi buǵan tek izdenip, kóp oqyp, eńbek etip qana jetýge bolatyndyǵyn biledi. Onyń taǵy bir qaǵıdaty - qarapaıymdylyq. Sýretshi qarapaıymdylyǵyn joǵaltsa, sulýlyqty kóre biletin, sezine alatyn tanym túısigin bitep tastaıdy. 45 jyl ǵumyryn sýret ónerine arnap, 8 myń kartına salǵan talantty da kásibı sýretshi Alpysbaı Qazyǵulov «boldym-toldym» demeı, kerisinshe «qazaqqa bergenimnen bererim kóp» deıdi.