Bıyl naýryzdyń on úshi kúni Temirtaýda kópqabatty úıdiń úshinshi qabatynda gaz jaryldy. Jarylystan alty adam zardap shekti. Onyń tórteýi bala, ekeýi eresek adam edi. Bul týraly ınternet arqyly aqparat tez tarady. Jarııalanǵan aqparatta kópqabatty úıdiń bir kireberisindegi on bes páter ıesiniń kóshirilgeni de aıtylǵan bolatyn. Aýyr haldegi eki eresek pen tórt bala da aýrýhanaǵa túsken edi sol sátte. Jarylys týraly barlyq BAQ málimeti osy syńaıda. Al osy alty adamdy gazdan tutanǵan órtten alyp shyqqan kim?
Ol jóninde birde-bir baspasóz, televıdenıe, ne aqparat agenttigi lám-mım demedi. Álbette, mynadaı aýyr jaǵdaı jasaǵan jaqsylyqty saýdaǵa salyp turatyn kez emes. Degenmen erlik ıesin el bilýge tıis. Ol azamat sol arada shuǵyl áreket etpegende, tórt balanyń taǵdyry ne bolary belgisiz edi. Alty adamdy qutqaryp qalǵan azamattyń esimi Talǵatbek, tegi Tóleýbaev. О́rt sóndirý qyzmetinde on alty jyldan beri júrgizýshi bolyp jumys isteıdi. Dál qaıǵyly oqıǵa oryn alǵan kúni Talǵatbek úıinde bolǵan eken. Jarylys úshinshi qabattan shyqqan. Al Talǵatbek ekinshi qabatta turady.
«Temirtaýda biz turatyn úıdiń úshinshi qabatynda gaz jarylǵanda, men eńbek demalysynda edim. Daladan úıge kirgenim sol edi, bes-on mınýttan soń jarylys boldy. Dúńk etip úı silkindi. Qarasaq, jarylystyń ekpini páterimizdiń esigindegi ilgekti julyp alypty. Úıden atyp shyqtym. Joǵary qabattan bir áıel ústi-basy janyp ketken, aıǵaılap júgirip keledi. Rasynda, kıimi túk qalmaı janyp ketipti. Ony úıimizge kirgizip jatqanda, «Oıbaı, balalar, balalar!» deı berdi. Ony estisimen órtengen páterge júgirdim. Adamnyń mundaıda oılanýǵa murshasy da kelmeıdi eken. Dereý páterge kirsem, balalardy da kúıik shalypty. Terileri túsip jatyr úlbirep. Birtindep kóterip alyp, úıge ákeldim. Eki áıeldiń bireýi úlken kisi, ekinshisi – alpystar shamasynda. Ústerindegi kıimderi túgelimen janyp ketipti. Kelinshegim shamasy kelgenshe úlkenderdi orap, kıindirdi. Páterden alyp shyqqan tórt bala da shyryldap jatyr. Bireýi jarymjan bala eken. Oǵan asa kúıik tımegendeı kórindi. Bilmeımin ǵoı biraq. Bárin kıindirip, dalaǵa shyǵaryp jatqanda basqa adamdar kelip kómektesti. Jasyratyny joq, ol kezde adamdardy qutqaryp qalýdan basqa oı bolǵan joq. Qolymyzdan kelgenshe kómek berýge tyrystyq. Keıbireýler «Telefonnyń beınejazbasyna túsirip almadyńyz ba?» deıdi. Mynadaı aýyr oqıǵada qaıdaǵy vıdeo?» deıdi Talǵatbek Zamanbekuly.
Jarylys bolǵan páterdegi altaýdyń ekeýi – balalardyń ájeleri. Qalǵan tórteýi olardyń nemereleri eken. Áke-shesheleri jarylys kezinde úıde bolmaǵan. Páter jaldamaly. Ballon páter ıesinen qalǵan. Talǵatbek Zamanbekuly osy oqıǵadan soń qos qarııanyń ońalmaǵanyn estigenin aıtady.
«Aman qalsa eken» dep barynsha tilep edik. Bizge basqa eshteńe de kerek emes edi, – deıdi Talǵatbek Tóleýbaev. – Alaıda adamnyń qalaýy bola bermeıtini taǵy shyndyq».
Qazirgi tańda Talǵatbek Zamanbekuly qyzynyń eki bólmeli páterinde turyp jatyr. Qyzynyń tórt balasy bar. Sóıtip, amalsyzdan eki bólmede onshaqty adam tirshilik etip keledi.
Temirtaý qalasy ákimdigi on bes páterdi jóndep berýge ýáde bergen. Biraq eki aı ótse de, eshteńe ózgermegen. Jaqynda sol úıdiń turǵyndarymen ótken jıynda eki aıdan soń tender ótetini, jóndeý jumystarynyń sodan keıin ǵana bastalatyny týraly aıtylǵan edi. Al tenderdiń qashan aıaqtalary taǵy belgisiz. Osy belgisizdik T.Zamanbekulyn qajytyp otyr. Ákimdik páter jaldaý aqysyn tólep berýge múddeli eken. Biraq ol da sheshim emes. О́z úıi – óleń tósegi bolmaǵan soń, bireýdiń úıinde ógeıdiń kúıin keshý alpystan asqan adamǵa ońaı emes.
T.Zamanbekuly ózin erlik jasadym demeıdi. Bizben suhbatynyń ózinde sózge sarańdyq tanytyp, aıtqysy da kelmedi. «Aman júr eken, bizge sol jetedi» degendi jıi aıtady. Áıtkenmen, syn sátte saýatty is-áreket ete bilgen jigit aǵasynyń bul batyldyǵyn erlik emes deýge kimniń dáti barady? Ottyń ortasynda qalǵan shyrqyraǵan tórt balany qutqarý úshin basyn báıgege tikken Talǵatbektiń batyldyǵy eskerýsiz qalǵany qynjyltady. Bar bolǵany Tótenshe jaǵdaılar departamentiniń basshysy Murat Qatpanovtyń Alǵyshaty berilipti. Degenmen ol da jasalǵan erlikke berilgen naqty baǵa desek, aqıqatqa qııanat jasaımyz.
Jasaǵan ıgi isin ózgeler sekildi jarnamalamaıtyn mundaı adamdardy qoǵam kóbine bile bermeıdi. О́ıtkeni qazir eseppen júretinderdiń baǵy janyp turǵan ýaqyt. Esesine T.Zamanbekuly sekildi azamattar bılikten eshteńe suramaıdy. Tek óziniń tıesili páteriniń jyldam jóndelip, baspanasyna kirýine ǵana muqtaj. Desek te, adam ómirin aman saqtap qalǵan azamattyń osynaý erligi eleýsiz qalmas degen úmit oty áli de sóngen joq. Alty adamdy qutqarý Alǵyshatpen ǵana aldarqatyp qoıatyndaı erlik emes qoı sebebi...
Qaraǵandy oblysy,
Temirtaý qalasy