Indýstrııa jáne ınfraqurylymdyq damý mınıstri Marat Qarabaevtyń aıtýynsha, búginde azamattyq avıasııada 20 myńǵa jýyq adam eńbek etedi. Alaıda 2025 jylǵa qaraı avıasııa salasynyń mamandaryna suranys eselep artýy múmkin degen boljam bar.
Osy máselege qatysty «Egemen Qazaqstan» gazetiniń «Ushqysh bolý ońaı ma?» maqalasyna kóz júgirtip kórsek.
«Qajetti maman tapshylyǵy máselesin sheshý men stýdentterimizdiń eńbek naryǵyndaǵy básekege qabilettiligin arttyrý úshin Ǵylym jáne joǵary bilim mınıstrligimen birlesip, eýropalyq standarttarǵa kóshý arqyly azamattyq avıasııa salasyna kadr daıarlaý júıesin túbegeıli reformalap, oqý úderisin IKAO-nyń ozyq standarttaryna saı jolǵa qoıý máselesi qarastyrylyp keledi», deıdi M.Qarabaev.
Joǵaryda aıtyp ótkendeı, elimizde 20 myńǵa jýyq adam avıasııa salasynda qyzmet etedi. Onyń ishinde ushqysh, ınjener, menedjer taǵy da basqa mamandardy qosqanda 107 mekemede jumys isteıdi eken. Salada 53 áýe kompanııasy qyzmet kórsetedi. Onyń 8-i kúndelikti jolaýshy tasymalyna aralasady. Al basqasy aýyl sharýashylyǵyn, maýsymǵa qaraı ushatyn charterlik reısti jandandyrsa, bul qatarǵa VIP jolaýshy tasıtyn kompanııa da qosylady. Onyń jeteýi – jergilikti shaǵyn aeroport. Almaty, Aqtóbede avıajóndeý zaýyty burynnan jumys isteıdi.
Avıasııaǵa maman daıarlaıtyn Ortalyq Azııadaǵy Azamattyq avıasııa akademııasy Almatyda ornalasqan. Onda joǵary jáne orta bilimdi mamandardy oqytady. Keńes ókimeti tusynda avıasııa salasynda 6 joǵary oqý orny bolǵan eken. Aqtóbedegi ýchılıshede ushqyshtar daıarlaǵan. Egemendik alǵannan keıin, 1995 jyly Azamattyq avıasııa akademııasy qurylyp, 2000 jyly birinshi túlekterin shyǵardy. Sodan berige deıingi aralyqty eseptesek, akademııa 23 jylda 7000 túlek daıarlapty. Olardyń shamamen 80%-y avıasııa salasynda eńbek etip júr. Biraq qazir salada 20 myń jumysshy eńbek etetinin eskersek, salystyrmaly túrde bilikti maman az ekenin ańǵaramyz. Bul – avıasııadaǵy mamandardyń orta jasy 50-den asatyny týraly derekti rastaıdy. Qysqasyn aıtqanda kadrlar qartaıyp barady.