Mádenıet jáne sport mınıstrliginiń qoldaýymen jaryqqa shyqqan «Besik jyry» qysqametrajdy anımasııalyq fılmi Úndistanda ótken Roshani International film festival 2023 festıvalinde «Úzdik anımasııalyq fılm» ataǵyn jeńip aldy.
Aýrangabad qalasynda tórtinshi márte ótken halyqaralyq festıvalde álemniń túkpir-túkpirinen talantty kınematografıster jınaldy. Bıyl baıqaýǵa 1 300-ge jýyq jumys usynylǵan. Onyń ishinde 132-si anımasııalyq fılm. Dala animation shyǵarmashylyq ujymy túsirgen «Besik jyry» mýltfılmi qazylardyń joǵary baǵasyn alyp, kórermenniń kóńilinen shyqty.
Týyndy 2021 jyly Ulttyq kınony qoldaý memlekettik ortalyǵynyń qoldaýymen jaryq kórgen bolatyn.
«Bul «Besik jyry» anımasııalyq fılminiń alǵashqy júldesi emes. Atalǵan mýltfılm mamyr aıynda Ispanııa astanasy Madrıdte ótken bedeldi kınofestıvalde «Eń úzdik qysqametrajdy anımasııalyq fılm» júldesin jeńip alǵan edi. Ol baıqaýǵa 1 500 anımasııalyq jumys úmitker retinde usynylǵan», dedi Mádenıet komıtetiniń tóraǵasy Arman Júdebaev.