Memleket basshysy Qasym-Jomart Toqaev quryltaıda sóılegen sózinde BAQ máselesine, onyń mańyzyna ári damýyna toqtaldy, dep habarlaıdy Egemen.kz.
Prezıdent BAQ-tyń qoǵamdyq pikir qalyptastyrýda mańyzdy ról atqaratynyn aıtty.
«Aqparat saıasatynyń tıimdiligin arttyrý, kreatıvti ındýstrııany damytý. Mass-medıa – elimizdi jańǵyrtý isine erekshe yqpal etetin sala. Sondaı-aq bılik pen qoǵam arasyndaǵy pármendi baılanys quraly. Aqparat quraldarynda túrli kózqarastar toǵysady. Ony qoǵam tynysynyń barometri deýge bolady. Osy saladaǵy ózekti máselelerdi sheshý úshin aqparat saıasatyn túbegeıli qaıta qaraý qajet. Kreatıvti ındýstrııany jańa deńgeıge kóterýimiz kerek. Qazir medıa salasy, kıno jáne serıal, mýltfılm, sport jáne mýzyka shoýlary, kompıýter oıyndary men kitaptar – bári birigip, birtutas júıege aınaldy», dedi Memleket basshysy.
Onyń aıtýynsha, bul júıe ozyq qundylyqtar men qasıetterdi qalyptastyrýǵa yqpal etedi. Prezıdent bul saladaǵy áleýetimizdiń orasan zor ekenin aıtty. Ony tolyqqandy júzege asyrý úshin naqty sharalar qabyldaý qajet.