Prezıdent «Balalar kitaphanasy» baǵdarlamasyn qolǵa alýdy tapsyrdy

Prezıdent elimizge sheteldik kitaptar kóptep keletinin aıtyp, otandyq kitap úlesin arttyrý máselesine toqtaldy.   «Ideologııa jumysyndaǵy basty baǵyttyń biri – kitap basyp shyǵarý isi. Qazaqstan naryǵynda shetel ónimderi basym ekeni jasyryn emes. Ádebı kitaptardyń 90 paıyzǵa jýyǵy syrttan keledi. Bul úrdistiń saldary qandaı bolatyny aıtpasa da túsinikti. Ulttyq múddege saı keletin kitaptardy kóptep basyp shyǵarý óte mańyzdy. Smartfon balanyń qolyndaǵy kitaptyń ornyn baspaýy qajet», dedi Memleket basshysy Qasym-Jomart Toqaev.

Sondaı-aq balalardy ulttyq qundylyq negizinde tárbıeleý úshin sol baǵyttaǵy kitaptardy oqytyp, jalpy kitapqa degen qyzyǵýshylyǵyn oıatýdyń mańyzyn atap ótip, arnaıy tapsyrma berdi.

«Qazir elimizdegi mektep kitaphanalarynda 130 mıllıonnan astam kitap bar. Biraq ondaǵy kórkem ádebıettiń úlesi mardymsyz. Shyn máninde, kitap oqıtyn el zııaly ultqa aınalady. Biz jas urpaqtyń kitapqa qushtarlyǵyn oıatýymyz kerek. Bul qıyn másele ekenin túsinemin. Ásirese, olardyń bar nazary áleýmettik jelide bolǵan kezde, tipti, qıyn. Biraq bul máselemen shuǵyldaný kerek. Basqa jol joq.

Sondyqtan «Balalar kitaphanasy» atty jańa baǵdarlamany qolǵa alýdy tapsyramyn. Qazaq ádebıetiniń túrli kezeńderin jáne janrlaryn qamtıtyn arnaıy tizim jasalýǵa tıis. Sol tizimdegi kitaptar barlyq balaǵa qoljetimdi bolýy kerek», dedi Prezıdent.