Memleket basshysy Qasym-Jomart Toqaev Ulttyq quryltaı otyrysynda táýlik boıy jumys isteıtin Prezıdent kitaphanasyn ashqysy keletinin aıtty, dep habarlaıdy Egemen.kz.
Prezıdent óz sózinde kitap oqıtyn eldiń zııaly ultqa aınalatynyn atap ótti.
«Martın Lıýter Kıng sııaqty meniń de kókeıimde júrgen bir arman bar, bul – táýlik boıy jumys isteıtin Prezıdent kitaphanasyn ashý. Men mundaı kitaphanany Ankarada kórdim. Onyń oqyrmandary álemniń ár túkpirinde basylyp shyqqan kórkem shyǵarmalardy, arnaýly ádebıetti oqı alady. Mundaı kitaphanany elimizde de salýǵa bolady dep oılaımyn», dedi Qasym-Jomart Toqaev.
Sondaı-aq Memleket basshysy ulttyq qundylyqtardyń áleýmettik jelide keńinen nasıhattalýyn qoldaıtynyn bildirdi.
«Jaqynda Májilis depýtaty Erlan Saırov qazaq mádenıetin TikTok platformasynda nasıhattaý joldary qarastyrylyp jatqanyn aıtty. Men muny qoldaımyn. Jastar jıi paıdalanatyn áleýmettik jelilerde ulttyq qundylyqtarymyzdy dáripteý – durys qadam», dedi Prezıdent.