Syr boıynda qurylys materıaldaryn óndirý aıasy keńeıe tústi. Kásipkerlikti damytý baǵdarlamasy sheńberinde memlekettik qoldaýǵa ıe bolǵan «Áset» JK salaǵa qajetti jańa ónimderdi shyǵarýǵa kiristi. Shaǵyn óndiris orny ulttyq joba aıasynda qaıtarymsyz grantqa ıe bolypty.
Kásiporyn qazir jylýdy syrtqa shyǵarmaıtyn panelder men sendvıch-panelder, fıbrobeton taqtalar jáne ózge de qurylys materıaldaryn shyǵaryp otyr.
– Sońǵy jyldary respýblıkamyzda qurylys ındýstrııasy jedel qarqynmen ósip keledi. Oblys ortalyǵymen qatar aýdandarda da túrli ǵımarat boı túzedi. Sondyqtan da ónimimiz suranyssyz qalmaıdy. Bizdiń seh Aral qalasynda ornalasqan, fıbrobetonnan taqtalar, panelder shyǵaramyz. О́nimderimiz halyqaralyq talaptarǵa saı, ishki naryqpen qatar eksportqa shyǵarýǵa da bolady, – deıdi kásiporyn basshysy Áset Jumaǵalıev.
Bilikti mamandardy biriktirgen zaýyt búgingi kúnniń talabyna saı ozyq tehnologııamen jabdyqtalǵan. Kásipker qaıtarymsyz grant qarajatyna kásiporynǵa zamanaýı qurylǵylar alypty. Zaýyt tolyǵymen avtomattandyrylǵan. Jańa tehnologııa ónimdilikti arttyryp, jumysty da jeńildetip otyr.
Qyzylorda