Búgin Májilistiń VIII shaqyrylymynyń birinshi sessııasynyń qorytyndy otyrysy ótti. Parlament Májilisiniń tóraǵasy Erlan Qoshanov atqarylǵan jumystardyń nátıjesimen bólisti, dep habarlaıdy Egemen.kz.
«Prezıdent Qasym-Jomart Kemeluly Toqaev osy sessııanyń ashylýynda Májilistegi árbir fraksııanyń aldyna birqatar mindetter júktedi. Fraksııa músheleri de, bir mandatty okrýgter boıynsha saılanǵan depýtattar da Memleket basshysynyń reformalaryn is júzinde júzege asyrýda belsendi jumys jasady, óıtkeni bul – elimizdiń damýyna úles qosatyn ortaq maqsatymyz. Sońǵy sessııa qysqa merzimge qaramastan óte mańyzdy jáne mazmundy boldy. Bul shaqyrylymnyń bir ereksheligi – kóptegen mańyzdy zań jobalaryna depýtattardyń ózi bastamashy boldy. Bul sessııada barlyǵy 31 zań qabyldandy. Onyń úshten biri depýtattar bastamashy bolǵan zańdar», dedi Erlan Qoshanov.
Sondaı-aq Erlan Qoshanov árbir depýtattyń bastamasynyń astarynda partııalar men depýtattardyń ustanymdary, saılaýshylardyń úmiti turǵanyn atap ótti. Onyń aıtýynsha, depýtattar saılaý naýqany barysynda aıtylǵan azamattardyń barlyq talaptaryn eskergen.
«Osylaısha, depýtattar qoǵamdyq baqylaý, zańsyz alynǵan múlikti memleket menshigine qaıtarý, jol qozǵalysyn uıymdastyrý, suıytylǵan gaz jáne turǵyn úı-kommýnaldyq sharýashylyq aınalymyn retteý máseleleri boıynsha onlaın-platformalarda jáne onlaın rejıminde zańdardy qabyldaýǵa bastamashy boldy. Árbir zań azamattyq qoǵam ókilderimen jan-jaqty talqylandy. Elbasy «Kúshti Prezıdent – yqpaldy Parlament – esep beretin Úkimet» formýlasyn jarııalaǵanyn bilesizder. Onyń aıasynda Májilistiń ókilettigi kúsheıtildi. Osy tujyrymdamany oryndaý maqsatynda osy sessııada biz birinshi ret Joǵarǵy esep palatasynyń esebin tyńdadyq. Depýtattar belsendiliginiń taǵy bir kórsetkishi – depýtattyq saýaldar. Bul sessııada árbir jalpy otyrysta orta eseppen 30-ǵa deıin depýtattyq saýal aıtyldy. Olardyń árqaısysy azamattardyń ómirin jaqsartýǵa baǵyttalǵan ótkir máselelerdi kóterdi. Árbir aıtylǵan máseleniń sheshimi bizdiń erekshe baqylaýymyzda bolady», dedi Erlan Qoshanov.
Sondaı-aq Erlan Qoshanov depýtattardyń jumysy saılaýshylar úshin árqashan ashyq ekenin atap ótti.
Onyń aıtýynsha, buǵan Memleket basshysynyń elimizdiń memlekettik telearnalarynda plenarlyq otyrystardy tikeleı efırde kórsetý bastamasy septigin tıgizip, kórermenniń ystyq yqylasyna bólendi.
«Barlyq deńgeıdegi kezdesýler men pikirtalastar BAQ ókilderi men sarapshylardyń qatysýymen barynsha ashyq ótkiziledi. Bul sessııada Májilis janyndaǵy Qoǵamdyq palatanyń jumysy da qyzý bastaldy. Halyqty erekshe tolǵandyratyn zań jobalary Palata otyrystarynda qoǵamdyq saraptamadan ótedi. Depýtattar halyqaralyq parlamenttik uıymdar aıasynda jáne ekijaqty parlamentaralyq yntymaqtastyqty nyǵaıtý baǵytynda da belsendi jumys atqardy.
Jaqynda biz Qazaqstannyń tóraǵalyǵymen ótken Ortalyq Azııa áıelderi dıalogynyń otyrysyn sátti ótkizdik», dedi Erlan Qoshanov.
Májilis Tóraǵasy depýtattarǵa da ún qatty.
«Sessııa aıaqtalýǵa jaqyn. Alda – aımaqtarǵa saparlar, halyqpen kezdesýler josparlanǵan. Biz ár óńirge, sonyń ishinde shalǵaı aýyldar men eldi mekenderge jetýimiz kerek. Bizdiń basty maqsatymyz – halyqpen birge bolyp, máselelerdi tıimdi sheshý, óńirlermen baılanysty nyǵaıtý. Jazda atqarylǵan jumystar kelesi sessııa jumysyna oń áserin tıgizedi dep oılaımyn», dep qosty Erlan Qoshanov.