Antıkor Almatynyń jer qatynastary salasyndaǵy júıeli jemqorlyq qylmystyq isterin tergep jatyr, dep habarlaıdy Egemen.kz Antıkordyń telegram arnasyna silteme jasap.
Sybaılas jemqorlyqqa qarsy qyzmet Almaty qalasynyń jer qatynastary salasyndaǵy júıeli buzýshylyq faktileri boıynsha qylmystyq isterdi tergeýdi jalǵastyrýda. Memleket qajettiligi úshin ákimshilik tarapynan jer ýchaskesin satyp alǵany úshin jeke basyna 45 mln teńge somasynda para alǵan qalalyq jer qatynastary basqarmasy basshysynyń mindetin atqarýshyǵa qatysty sotqa deıingi tergeý bastaldy. Sottyń sanksııasymen ol qamaýǵa alyndy.
Tergeý sonymen qatar osy basqarmanyń laýazymdy tulǵalary affılıırlengen baǵalaýshynyń kómegimen jeke jer ıeleriniń múddesi úshin memlekettik satyp alýǵa jatatyn 8 ýchaskeniń qunyn negizsiz kótergeni anyqtaldy. Nátıjesinde memleket osy ýchaskelerdiń ıelerine shamamen 7,5 mlrd teńge artyq tólegen. Bul rette baǵalaýshynyń bir obekt úshin kórsetiletin qyzmetteriniń quny 2021 jyly ortasha eseppen 68 teńgeni jáne 2022 jyly 10 teńgeni quraǵan.
Sonymen qatar qoldanystaǵy zańnamany óreskel buzýshylyqtar Almaty qalasy Qalalyq josparlaý jáne ýrbanıstıka basqarmasynyń qyzmetinde de anyqtaldy. Basqarmanyń laýazymdy adamdary memleket múddesine qaıshy, jeke turǵyn úı qurylysyna arnalǵan ýchaskelerde kommersııalyq maqsatta 11 kóppáterli turǵyn úı kesheniniń qurylysyn keliskeni anyqtaldy.
Nátıjesinde memleketke atalǵan jer ýchaskeleriniń jalpy somasy 760 mln teńgeden astam tólenbegen kadastrlyq quny túrinde zalal keltirildi. Barlyǵy 470-ten astam jer ýchaskesi tekserýmen qamtyldy. Jer qatynastary salasyndaǵy júıeli jemqorlyqty anyqtaý jáne jolyn kesý jumystary jalǵasyp jatyr.
Tergeý múddesi úshin ózge aqparat jarııa etilmeıdi.