Bul týraly Memleket basshysy Qasym-Jomart Toqaev Astananyń 25 jyldyq mereıtoıyna arnalǵan baýyrlas qalalar forýmynda aıtqan edi, dep habarlaıdy Egemen.kz.
Eske sala ketsek, baýyrlas qalalar forýmy 5 maýsymda ótken. Onda elordanyń keshegi tarıhy, búgingi áleýeti men erteńgi bolashaǵy saralandy.
«Astana – bolashaǵy zor qala. Osy oraıda, biz «jasyl qala» ıdeıasyn júzege asyrýǵa aıryqsha mán beremiz. Elordamyz, eń aldymen, turǵyndarǵa yńǵaıly qala bolýy kerek. Astana – aımaqtaǵy iri qarjy ortalyǵy. Álemniń 75 eliniń 2 myńnan asa kompanııasy bıznes júrgizý úshin Astana halyqaralyq qarjy ortalyǵyn tańdady. Búginde Qarjy ortalyǵy elimizge 8 mıllıard dollar ınvestısııa tartty. Bul – jaqsy kórsetkish», dedi Prezıdent Qasym-Jomart Toqaev.
Memleket basshysynyń aıtýynsha, álemdik saıasatshylar Astanany beıbitshilik alańy retinde tanıdy. Sebebi ustanymy bólek, múddeleri kereǵar elder Qazaqstan júreginde bitimge kelgen.
«Keleshekte de Astana bizdiń geosaıası aımaqtaǵy mańyzdy ortalyq retinde damı bermek. Men buǵan kámil senemin», dedi Prezıdent forým barysynda.