Mańǵystaý oblysynda jyl basynan beri 360 sharýashylyqqa asyl tuqymdy mal sharýashylyǵyn damytýdy, onyń ónimdiligin arttyrýdy sýbsıdııalaý baǵyttary boıynsha 776,7 mln teńge berildi. Onyń ishinde 719,7 mıllıon teńge jem-shópke tólendi.
Aýyl sharýashylyǵy basqarmasy mal sharýashylyǵy bólim basshysynyń mindetin atqarýshy Ashat Shaıhıevtiń aıtýynsha, ótinimder Plem.kz saıty arqyly qabyldanyp, basty nazar janýardyń analyq basynyń azyǵyna aýdarylǵan.
«Byltyr 330 sharýashylyqqa 702,6 mln teńge qarjy berildi. Onyń ishinde 329 sharýa qojalyqqa 619,1 mln teńge mal azyǵyna ketken shyǵyndy óteýge tólendi. Ár jyl saıyn bólingen qarjyny ıemdengen azamattar aýyl sharýashylyǵyn damytyp, tórt túlik maldyń kóbeıýine úlesin qosyp keledi. Áli de birneshe sharýa qojalyqtarynyń ótinishterin qaraý ústindemiz. О́tinimder qabyldaý júrip jatyr», deıdi oblystyq aýyl sharýashylyǵy basqarmasy mal sharýashylyǵy bólimi basshysynyń mindetin atqarýshy Ashat Shaıhıev.
2023 jyly sýbsıdııa alǵandardyń biri - Anar Dáýletkereı. Ol memleketten 1 mln 474 myń teńge qarajat alyp, jem-shóp satyp alý arqyly mal sharýasyn damytyp keledi. Ekinshi jyl qatarynan sýbsıdııa alǵan Anar Dáýletkereı memleket tarapynan aýyl sharýashylyǵyn damytý úshin kóp jaǵdaı jasalǵanyn aıtady.
«Búginde ózimmen birge taǵy 4 adamdy jumyspen qamtyp otyrmyn. Memleketten beriletin sýbsıdııa jem-shóp satyp alyp, kásibimdi ári qaraı damytýǵa úlken paıdasyn tıgizip jatyr. Sýbsıdııa bolmasa sharýashylyqtarǵa óte qıyn. Berilgen qarajattyń arqasynda túıe, jylqylarymyz qystan aman-esen shyǵyp, mal basyn kóbeıtip jatyrmyz», deıdi Anar Dáýletkereı.
Aıta keteıik, bıyl aýyl sharýashylyǵyn damytý úshin 3 kásipker 15 mıllıon teńge grantqa ıe boldy. Olardyń biri eshki sútinen ónimder óndirý arqyly halyqqa paıdasyn tıgizse, endi biri qoı-túıe júnin paıdaǵa asyryp, kádesyı daıyndap júr.
Aqtorǵyn О́tesbaı