Qyzylorda qalasyndaǵy darııanyń sol jaǵalaýynan boı kótergen jańa aýdan turǵyndarynyń qatary jyl sanap kóbeıip keledi. Jýyrda osy aýdanda fızıka-matematıka baǵytyndaǵy mektep-ınternat ǵımaratynyń irgetasy qalandy. Qurylysyna 8 mlrd teńge jumsalatyn bilim ordasy keler jyly aıaqtalyp, zamanaýı jabdyqtarmen jaraqtalady.
Oblys ákimi Nurlybek Nálibaev is-sharaǵa jınalǵandardy jańa bilim ordasynyń irge kóterýimen quttyqtady.
– Memleket basshysy Qasym-Jomart Kemeluly Toqaev Joldaýynda «Orta bilimniń sapasy – tabysty ult bolýdyń mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis», degen bolatyn. Prezıdent qazirgi sıfrlandyrý, ındýstrııalandyrý zamanynda IT salasyna degen suranys pen tehnıkalyq ǵylymdardyń mańyzdylyǵyn eskere kele, jaratylystaný-matematıka baǵytyndaǵy pánderge basymdyq berýdi tapsyrdy. Bul rette el damýyna ózindik úles qosatyn mamandardy oqytý, IT salasyna jańa lep ákeletin baǵyttardy damytý – bizdiń basty mindetimiz, dedi aımaq basshysy.
Jınalǵan qaýymdy memleket jáne qoǵam qaıratkeri Murat Baqtııaruly men bilim salasynyń ardageri Baqbergen Dosmanbetov quttyqtady.
Byltyr oblysta 19 balabaqsha, 6 mektep, Jalaǵash aýdanynda Oqýshylar úıi jáne О́ner mektebi qoldanysqa berilgen bolatyn. Aldaǵy 3 jylda 64 balabaqsha jáne «Jaıly mektep» ulttyq jobasy aıasynda 15 100 orynǵa arnalǵan 21 mektep boı kóteredi. Osy kúni oblysta 21 jeke bilim ordasy jumys istep tur, 3 jylda ınvestorlar taǵy 12 mektep salýǵa bel baılap otyr.
Al osy fızıka-matematıka baǵytyndaǵy mektep-ınternat máselesi Úkimet basshysy Álıhan Smaıylovtyń ótken jyly óńirge jasaǵan saparynda sheshimin tapty. Oblys ortalyǵyndaǵy №101 Á.Múslimov jáne №2 Abaı atyndaǵy mektepterge qosymsha qurylys salý, «Báıterek» turǵyn aýdanyndaǵy 600 oryndyq jáne Shıeli aýdany Baısyn aýylyndaǵy 250 oryndyq mektep qurylysyn aıaqtaý da sol sapar aıasynda naqtylandy.
Aldaǵy ýaqytta sol jaǵalaýdan jańa avtovokzal ashylady. Aımaqta kólik ınfraqurylymyn damytý sheńberinde jańa aýdannan osyndaı nysannyń irgetasy qalandy.
О́ńir basshysy ótken jyldan beri Qyzylordanyń negizgi qaqpasy sanalatyn áýejaı, temirjol vokzaly, avtovokzal ınfraqurylymyn damytýǵa basymdyq berilgenin atap ótti. Osy jyldyń naýryz aıynda Bolat О́temuratov qorynyń qoldaýymen quny 15 mlrd teńge bolatyn Qorqyt Ata áýejaıy termınalynyń qurylysy bastaldy. Endi jolaýshylar men tasymaldaýshylarǵa qyzmet kórsetetin, barlyq standart talaptaryna sáıkestendirilgen zamanaýı úlgidegi jańa avtovokzal ǵımaraty boı kótere bastaıdy. Bul keshen jol qatynasynyń rettelýine negiz bolady. Munda tek avtovokzal ǵana emes, iri saýda jáne qoǵamdyq tamaqtaný, turmystyq qyzmet kórsetý oryndary, qoımalar, avtokólik jóndeý sehtary da jumys isteıdi.
Jańa avtovokzal paıdalanýǵa berilgennen keıin 55 avtobýs marshrýty uıymdastyrylady. Munan bólek, Tashkent qalasyna 1 halyqaralyq reıs, 46 aýdanaralyq, Astana, Almaty, Shymkent, Jezqazǵan, Túrkistan, Saryaǵash, Jibek joly, Aqtóbe jáne taǵy basqa qalalarǵa 8 marshrýt jolǵa shyǵady. Nysan jaz mezgilinde kúnine 3 700-den astam, qysta myńnan astam jolaýshyǵa qyzmet kórsetýge yńǵaılastyrylyp salynady. Quny 975 mln teńge bolatyn jańa avtovokzal qurylysy jyl sońyna deıin aıaqtalyp, qoldanysqa berilmek.
О́ńirdegi jolaýshylar tasymalynyń jolǵa túsýine «Batys Eýropa – Batys Qytaı» kúre jolynyń tıgizgen áseri kóp. Oblys ortalyǵynda da jolaýshylar tasymaldaý qyzmetin jaqsartý úshin ótken jyly zamanaýı 150 jańa avtobýs satyp alyndy. Bıyl olardyń qataryna taǵy 150 avtobýs qosylyp, shahardaǵy qoǵamdyq kólik máselesi túbegeıli sheshimin tappaq.
Qyzylorda