Kókshetaý qalalyq soty «Avısenna – Býrabaı» JShS basshysy men Aqmola oblysy densaýlyq saqtaý basqarmasynyń burynǵy basshysyna úkim shyǵardy, dep habarlaıdy Egemen.kz.
Anyqtalǵandaı, kásipker men densaýlyq saqtaý basqarmasynyń burynǵy basshysy jeke qylmystyq is boıynsha tergelip jatqan úshinshi tulǵamen qylmystyq kelisimge kelgen. Olar 2017 jyly Býrabaı aýdanyndaǵy densaýlyq saqtaý nysandaryn senimgerlik basqarýǵa berý týraly kelisimge qol qoıǵan.
Shart boıynsha «Avısenna – Býrabaı» JShS standarttar men tehnıkalyq sharttarǵa, sapa kórsetkishterine jáne normatıvtik quqyqtyq aktilerge sáıkes keletin jańa medısınalyq jabdyqtardy satyp alýǵa mindettelgen. Is júzinde kásiporyn sapasyz medısınalyq qural-jabdyqtardy jetkizip, bir mıllıard teńgeden astam qarjyny ıemdengen.
«Kásipker asa iri kólemde alaıaqtyq jasady (Qylmystyq kodekstiń 190-babynyń 4-bóligi, 2-tarmaǵy), laýazymdy tulǵa alaıaqtyqqa qatysqan (Qylmystyq kodekstiń 28-babynyń 5-bóligi, 190-babynyń 4-bóliginiń 2-tarmaǵy). Olardyń kinási kýálar men jábirlenýshi taraptyń aıǵaqtarymen, sot-medısınalyq saraptamalardyń qorytyndylarymen rastalady. Jaza taǵaıyndaý kezinde sot sottalýshylar laýazymdy tulǵa bola tura, ant berip, qyzmettik babyn paıdalanyp, qylmys jasaǵanyn, materıaldyq zalaldy ótemegeni sııaqty aýyrlatatyn mán-jaılardy eskerdi», delingen sot habarlamasynda.Eki aıyptalýshy da toǵyz jylǵa sottaldy. Kásipkerdiń kóligi tárkilendi.