Sońǵy kúnderi aptap ystyqqa baılanysty Batys Qazaqstan oblysynda túrli órt oqıǵasy kóbeıip ketti. Ásirese 9 shilde kúni oblystyń ár jerinde shyqqan órt sany 40-tan asyp ketti, dep habarlaıdy Egemen.kz.
Tilsiz jaý Oral qalasynda, sondaı-aq Aqjaıyq, Terekti, Syrym, Bórli, Qaztalov jáne Báıterek aýdanynan shyqqan. Terekti aýdanyndaǵy Ábdirahman Áıtıev atyndaǵy aýylda bolǵan órttiń qaýiptiliginen 10 úıdiń turǵyndary ýaqytsha kóshirildi. Oqıǵa ornyna Batys Qazaqstan oblysynyń ákimi Narıman Tóreǵalıevtiń ózi baryp, tótenshe jaǵdaıdy kózimen kórdi. Barlyq arnaýly kúshter men mamandar jumylyp, úılesken qımyldyń arqasynda eki qora ǵana órtendi, mal-jan, turǵyn úıler aman qaldy. Túngi saǵat 00:40-ta aýyldaǵy órt tolyq sóndirildi, 44 adam úıine oraldy. Osy oqıǵanyń saldarynan 26 ga memlekettik orman qory jáne 24 ga qurǵaq shóp janyp ketti.
Oral qalasynyń ózinde úıirile soqqan qatty jeldiń áserinen aǵashtar qulap, elektr jelisine zaqym kelgen. Jergilikti ýaqyt 14:15-te 10 m/s jeldiń ekpini Oral qalasynyń jeke úıler ornalasqan sektory ishinara zardap shekti. Barlyǵy 800-ge jýyq jeke úı, onyń ishinde Derkól kenti, Jelaevo kenti, Kóne áýejaı shaǵyn aýdany, 2-shi jumysshy, ortalyq bazar aýmaǵy (barlyǵy 1898 jeke turǵyn úı) jartylaı jaryqsyz qaldy. Batys Qazaqstan AEJK JShS kúshimen (40 adam jáne 10 adam) kezeń-kezeńimen qosylý júrgizilýde.
Oblystyń ár jerinde shyǵyp jatqan órttiń basym kópshiligi dala órti, qurǵaq shóptiń janýy bolyp tur. Oqıǵa bolǵan jerlerge arnaıy toptar jiberilip, apattyq-qutqarý jumystary jasalýda.
Qazir Batys Qazaqstan oblystyq Tótenshe jaǵdaılar departamentiniń bazasynda jedel shtab ashylǵan. Onyń quramynda barlyq kommýnaldyq qyzmet bar. Osylaısha oblystaǵy barlyq aqparat saralanyp, jaǵdaı baqylanyp otyr. Shekaralyq aımaqtarda reseılik tótenshe jaǵdaı arnaıy qyzmetterimen habar almasýda.
Keshe keshkisin eń kúrdeli jaǵdaı Terekti aýdanynyń Qumaqsaı aýylynda bolǵan edi. 25 gektar alqapty sharpyǵan órt ormanǵa aýysyp kete me degen qaýip bolǵan. О́rt sóndirýshiler jumyla qımyldap, der kezinde órtti oqshaýlady. Shamamen 25 ga alqap otqa oranǵan. Oqıǵa ornynda jergilikti atqarýshy mekemeler, erikti órt sóndirýshiler qurylymy, TJD, «Qazavtotrevel» mekemesinen shamamen 50 adam, 15-ten asa tehnıka bolǵan.
Aýa-raıyn boljaý mekemeleri Batys Qazaqstan oblysy boıynsha 10-shilde kúni de daýyldy eskertý jarııalady: 10 shildede 35-39 gradýsqa qatty ystyq saqtalady. 10-11 shildede oblystyń ońtústiginde, shyǵysynda órt qaýpi joǵary. Ońtústik, ońtústik-shyǵysynda kúndiz jel ekpini 18 m/s. qatty ystyq 37-39 gradýs bolady dep kútilýde. Qazirgi ýaqytta oblys boıynsha jaǵdaı kúrdelene túsýde, janý men órttiń barlyq faktileri Tótenshe jaǵdaılar departamentiniń erekshe baqylaýynda.
Joǵaryda aıtylǵandaı, jaǵdaıdy oblys basshysy da qadaǵalap otyr. 10 shildegen qaraǵan túngi saǵat 02.30-da Tótenshe jaǵdaı departamentinde qurylǵan jedel shtabta Narıman Tóreǵalıev Qaztalov, Tasqala, Aqjaıyq jáne Syrym aýdandary aýmaǵynda oryn alǵan órtti aýyzdyqtaý boıynsha úılestirý jınalysyn ótkizgen.
«Jergilikti atqarýshy organdar men órt sóndirýshiler 24/7 rejıminde jumys isteýde. Iri órt oshaqtary bar aýdandardyń basynda bir orynbasarym jáne Tótenshe jaǵdaı departamenti basshysy jumystanýda. О́rtti lokalızasııalaýǵa departament kúshterinen bólek sharýa qojalyqtary, jergilikti aýyl turǵyndary qol ushyn berýde.
...Osyǵan oraı, qaýipsizdik erejelerin qatań saqtaýdy suraımyn: jol jıegine temeki tuqylyn tastamańyz, tabıǵat aıasyna demalys kezinde ot jaqpańyz, óte qatty ystyq kúnderi shóp shabý jumystaryn ýaqytsha toqtatyp, shópti tasymaldaǵan kezde tek ushqyn ustaǵyshpen jabdyqtalǵan tehnıkany paıdalanyńyz», degen úndeý taratty BQO ákimi.
10 shilde kúni tústen keıin Batys Qazaqstan oblysynyń batysynda, soltústiginde naızaǵaı, burshaq, oblystyń ońtústiginde, batysynda shańdy daýyl kútilýde. Jel ońtústik, ońtústik-shyǵystan, kúndiz oblystyń úlken bólikterinde ekpini 15-20 m / s. 35-39 gradýsqa deıin qatty ystyq saqtalady. 10-11 shildede oblystyń ońtústiginde, shyǵysynda órt qaýpi joǵary. Oral qalasy boıynsha: 10 shilde kúni tústen keıin naızaǵaı, burshaq kútiledi. Jel ońtústik, ońtústik-shyǵys kúndiz jel ekpini 18 m/s. 37-39 gradýsqa deıin qatty ystyq kútilýde. 10-11 shildede órt qaýpi joǵary bolady dep kútilýde. Osyǵan baılanysty, órt qaýipsizdiginiń barlyq erejelerin qatań saqtaý talap etilýde.
Batys Qazaqstan oblysynda jıilep ketken órtti sóndirý úshin kórshiles Aqtóbe oblysy Tótenshe jaǵdaılar departamentinen 32 adam men 5 tehnıka jolǵa shyqty, dep habarlaıdy Tótenshe jaǵdaılar mınıstrligi baspasóz qyzmeti.
Dala órtin jedel sóndirý úshin Astanadan Qazavıaqutqarý-875 tikushaǵy da ushyp shyqqan.