Qostanaıda «CyberPol» qyzmetkerleri turǵyndardy 20 mln teńgege aldaǵan alaıaqty anyqtady, dep habarlaıdy Egemen.kz Polisia.kz-ke silteme jasap.
Qostanaı oblysynyń polısııasyna Qostanaı qalasynyń 6 turǵynynan «sizdiń qyzyńyz jol kólik oqıǵasyna tústi» degen dástúrli shemany paıdalana otyryp, olardy alaıaqtar aldaǵany týraly aryz kelip tústi. Zalal somasy 20 mln teńgeden asty.
Barlyq ótinishter boıynsha QR QK-niń 190-baby 3-bóligi (Alaıaqtyq) boıynsha sotqa deıingi tergeý bastaldy.
Tergeýge «Cyberpol» bólimshesi men Qostanaı qalasy polısııa basqarmasynyń qyzmetkerleri kiristi.«Jedel-tergeý is-qımyldaryn júrgizý kezinde oblys ortalynyń 6 turǵyny zardap shekkeni anyqtaldy. Olardyń barlyǵy zeınetkerlik jáne zeınetkerlik jasqa deıingi adamdar. Olarǵa úı telefonyna qońyraýlar kelip, belgisiz adamdar týystarynyń apatqa ushyraǵanyn habarlaǵan. Alaıaqtar qolda bar aqshany berýdi suraǵan», dedi «CyberPol» bólimshesiniń qyzmetkeri Oljas Maǵyparov.
Sonymen birge jábirlenýshiler olardyń úıine kelip otyrǵan qyzǵa aqsha bergen. Onyń syrtqy kelbeti týraly sıpattamalar ár túrli boldy. Ol jasandy shash aýystyryp otyrǵan. Onyń ústine qara kózildirikti jáne ár túrli bas kıimderdi qoldanǵan.
«Alaıaq Qostanaı qalasyndaǵy qonaq úılerdiń birinde lıýks nómirinde ustaldy. Odan 800 myń teńge somasynda aqsha alyndy. Ol qalǵan qarajatty qymbat telefon, zattar men oıyn-saýyq quraldaryn satyp alýǵa jumsaǵan», dedi Oljas Maǵyparov.
Qazirgi ýaqytta kúdikti QR QIJK-niń 128-baby tártibimen ÝUI-ǵa qamaldy.