«Alayaq.net» portaly aqyly ınternettegi alaıaqtyq jaǵdaılary týraly habarlap qana qoımaı, qarjylyq saýattylyq deńgeıin arttyrýǵa, sondaı-aq ınternettegi alaıaqtyqqa qarsy respýblıkalyq jastar qozǵalysyna qosylýǵa bolady, dep habarlaıdy Egemen.kz Azamattyq bastamalardy qoldaý ortalyǵynyń baspasóz qyzmetine silteme jasap.
Qazaqstanda QR Aqparat jáne qoǵamdyq damý mınıstrliginiń qoldaýymen respýblıkalyq «Alayaq.net» jastar qozǵalysy qarqyn alyp jatyr. Jańa joba jastardyń qarjylyq saýattylyǵyn arttyrýǵa, jelidegi alaıaqtyq jaǵdaılarynyń aldyn alýǵa, ınternet-alaıaqtyqqa qarsy kúreste jastar men memlekettik organdardy, bank sektoryn jumyldyrýǵa baǵyttalǵan.
2024 jyldyń sońyna deıin iske asyrylatyn joba sheńberinde «Medısına jastary» qoǵamdyq birlestigi alaıaqtyq shemalardyń aldyn alý jáne jastardyń qarjylyq saýattylyǵyn arttyrý jónindegi «Alayaq.net» ınternet-portalynyń jumysyn uıymdastyrdy.
«Biz alaıaqtardan qorǵanýdyń joldary týraly paıdaly aqparatty, túrli alaıaqtyq shemalardy áshkereleıtin beınerolıkterdi usyndyq. Munda adal blogerlerdiń tizimderimen tanysýǵa da bolady. Sondaı-aq belgili bir ınflıýenserdiń qara tizimde bar-joǵyn tekserý múmkindigi de qarastyrylǵan. Eń bastysy, bizdiń portaldyń kómegimen azamattar ınternettegi alaıaqtyq faktileri týraly habarlaı alady, «Alayaq.net» respýblıkalyq jastar qozǵalysynyń múshesi atanyp, alaıaqtyqpen kúreske óz úlesin qosa alady», dedi joba jetekshisi Abylaıhan Ábdirash.
Onyń aıtýynsha, joba uıymdastyrýshylary kelip túsken barlyq ótinimder boıynsha tegin konsýltasııalyq kómek kórsetedi.
Búginde joba uıymdastyrýshylary myńnan astam ótinimdi qabyldap, óńdegen.