Qyzylordada ótken jyly qalany abattandyrý, eldi mekenderdi damytý, aýyl turǵyndaryna jaıly orta jasaý baǵytyndaǵy «Úlgili eldi meken» oblystyq konkýrsy jarııalanǵan edi. Tuńǵysh ótetin konkýrstyń talaptary keńinen tanystyrylyp, buqaralyq aqparat quraldarynda nasıhattaldy. Úzdikterdi azamattyq qoǵam ókilderinen, depýtattardan, jýrnalıster men ekobelsendilerden qurylǵan táýelsiz sarapshylyq komıssııa anyqtap, sheshim qabyldady. Jýyrda qala ortalyǵyndaǵy «Dostyq úıinde» oblys ákimi Nurlybek Nálibaev baıqaý jeńimpazdaryn marapattady.
Tirshiligin túzetip, aınalasyna úlgi bolýǵa talpynǵan aýyldardy marapattap, mereıin ósirý buryn da bar dástúr edi. Al byltyr bastaý alǵan myna konkýrstyń kózdegeni – aýyldar men qalany qatar damytý. Saltanatty rásimde aımaq basshysy osyny basa aıtty.
– Memleket basshysy Túrkistanda ótken Ulttyq quryltaıda «Tazalyq pen uqyptylyq kúndelikti ómir saltymyzǵa aınalýy qajet. Qalalar men aýyldardyń sáýletti, saıabaqtar men aýlanyń taza bolýy eń aldymen basqa bireýge emes, ózimizge kerek. Azamattarymyz qoǵamdyq oryndar men qorshaǵan ortaǵa janashyr kózqaraspen qaraýy tıis», degen bolatyn. Qazaqylyqtyń qaımaǵy buzylmaǵan, ulttyq dástúrdiń altyn qazyǵy sanalatyn syrboıylyqtar bul bastamany negizgi qaǵıda etetini sózsiz. Prezıdenttiń «Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasyn bekitý týraly» Jarlyǵy aıasynda Úkimet pen ákimdikter aldaǵy bes jyldyqta aýyl- dy damytýǵa kúsh salýda. Árbir eldi meke- ninde aýqymdy sharalar úzdiksiz uıym- dastyrylyp keledi, – dedi oblys ákimi.
Atalǵan tujyrymdama aıasynda byltyr óńirge 9,9 mlrd osy jyly 17 mlrd 100 mln teńge bólinip otyr. Bul qarjy eldi mekenderdiń ınjenerlik-ınfraqurylymyn jańǵyrtýǵa, áleýmettik nysandar salý men jóndeýge, mamandardy áleýmettik qoldaýǵa, shaǵyn jáne orta kásipkerlikti damytýǵa baǵyttalady.
Jıynda aımaq basshysy «Úzdik eldi meken» konkýrsyn dástúrli túrde jyl saıyn ótkizý josparlanǵanyn atap ótti. Aınalasyna birlik arqyly týǵan topyraqty túletýge bolatynyn kórsetken jeńimpazdarǵa kúndelikti turmysqa eń qajetti, zamanaýı tehnıkalar tabystalady. Abattandyrýda aldan kóringen qaladaǵy shaǵyn aýdandarda kóshe, aýlalardy jaryqtandyrý, balalar jáne sporttyq oıyn alańdaryn, gúlbaq salý syndy jobalar oblystyq bıýdjetten qarjylandyrylady.
– Kúzde «Úlgili eldi meken» konkýrsy qalanyń shaǵyn aýdandary, aýdan ortalyqtary men aýyldar arasynda qaıta jalǵasady. Qazirdiń ózinde oblystyq bıýdjetten 523 mln teńge qarjy bólinip, daıyndyq jumystary bastaldy, – dedi Nurlybek Mashbekuly.
Áleýmettik jaýapkershilikti sezingen aımaq kásipkerleri de el ekonomıkasyn damytýǵa qomaqty úles qosyp otyr. Jergilikti iskerler men qazir elimizdiń ár túkpirinde júrgen mesenattar «Týǵan jerdi birge túleteıik!» bastamasyn qoldady. Osylaısha, qazir óńirde demeýshilikpen barlyǵy 30 mlrd 100 mln teńgeniń jobalary júzege asýda. Onyń ishinde eldi mekender men qalany kórkeıtýge basymdyq berilgen. Demeýshilerdiń qoldaýymen 1 mlrd 100 mln teńgege oblys ortalyǵyndaǵy 50 úıdiń qasbeti zamanaýı paneldermen qaptalýda. Taǵy 1 mlrd teńgege 20 kópqabatty turǵyn úıdiń aýlalaryna sport alańdary salynyp, trotýarlar men jaryq baǵanalary jańartylyp jatyr.
Oblys turǵyndary atynan isker azamattarǵa alǵys aıtqan oblys ákimi taǵy bir erekshe bastamany atap ótti.
Qazirgi talap, qala men aýyl turǵyndaryna birdeı jaǵdaı jasaý, ortalyq pen shalǵaıdaǵy eldi mekender arasyndaǵy aıyrmashylyqty azaıtý. Aldaǵy ýaqytta aýdan ortalyqtaryndaǵy turǵyndar tilegi boıynsha mýzeı, kitaphana, arhıv, neke qııý zaly, ardagerler jáne analar, jastar ortalyqtary syndy birqatar mekeme biriktirilip, olarǵa zamanaýı bir ǵımarat salý oılastyrylyp otyr.
Aımaqta alǵash ret ótkizilip otyrǵan «Úlgili eldi meken» oblystyq konkýrsyndaǵy «Úlgili aýyl» atalymy boıynsha úshinshi orynnan Aral aýdany Amanótkel aýyly kórinip, eldi mekenge ámbebap tıegish traktor tabystaldy. Ekinshi oryn jeńimpazy Jalaǵash aýdanyndaǵy Tań aýylyna jer qazatyn traktor tirkemesimen berildi. Al jeńimpaz – Syrdarııa aýdanyndaǵy Naǵı Ilııasov aýylyna jer qazatyn traktor men júk tasymaldaıtyn KamAZ kóligi tabystaldy.
«Úlgili aýdan ortalyǵy» atalymynda úshinshi orynnan kóringen Qazaly aýdanyndaǵy Áıteke bı kentine assenızator kóligi men jol tazalaıtyn traktor berildi. Al ekinshi orynǵa ıe bolǵan Shıeli kenti qaldyq tasymaldaıtyn KamAZ kóligin, jol tazalaıtyn traktor jáne assenızator kóligine qol jetkizdi. Birinshi oryn alǵan Jańaqorǵan kentine qaldyq tasymaldaıtyn KamAZ, arnaıy jol tazalaıtyn kólik, assenızator men kran manıpýlıatory tabystaldy.
«Qyzylorda qalasynyń úlgili shaǵyn aýdany» nomınasııasy boıynsha úshinshi oryn jeńimpazy bolǵan Báıterek-Shuǵyla shaǵyn aýdanyna «Skver qurylysy» jobasy syıǵa tartyldy. Ekinshi oryn jeńimpazy Syrdarııa shaǵyn aýdanyna «Balalar jáne sporttyq oıyn alańdary qurylysy» jobasy tapsyryldy. Birinshi oryn jeńimpazy Araı-2 shaǵyn aýdany «Skver, sporttyq oıyn alańdary qurylysy jáne kóshe-aýlalardy jaryqtandyrý» jobasyn aldy. Bul jobalar oblystyq bıýdjet esebinen salynady. Oblystyq konkýrsqa qatysyp, kórkeıtý-kógaldandyrý sharalaryna úles qosqan birqatar azamattar da marapattaldy.