Birqatar qaraǵandylyq kenshi qonystoıyn atap ótedi. Oblys ákimdigi «Otbasy bankimen» birlesip, ústemesi jeńildetilgen ıpotekany eńbekkerlerge úlestirýdi byltyr jolǵa qoıǵan-tyn. Bul joly ıgi bastamaǵa «Shubarkól Kómir» kómir óndirýshi kompanııasy qosylyp, óz qyzmetkerleriniń baspana máselesin sheshýge septigin tıgizip otyr.
Turǵyn úı sertıfıkattaryn tapsyrý rásimine Qaraǵandy oblysynyń ákimi Ermaǵanbet Bólekpaev, «Otbasy bank» AQ Basqarma tóraıymy Lázzat Ibragımova jáne ERG Dırektorlar keńesiniń múshesi Shýhrat Ibragımov qatysty.
– Yntymaqtastyq úshin «Otbasy bankine» alǵys aıtamyz. Ákimdik tarapynan biz udaıy osyndaı paıdaly baǵdarlamalardy turaqty qoldaıtyn bolamyz. Turǵyn úı – eń ózekti ári eń mańyzdy másele. Bul bastama kenshilerimiz úshin zor qýanysh desek te bolady. Baspana tańdaýshylarǵa aldymen asyqpaýǵa keńes beremin, búginde páterlerdiń tańdaýy keń. Bıyldyń ózinde 800 sharshy metrdi quraıtyn turǵyn úı qatary salynyp jatyr. Bastapqy naryq baǵamy da qoljetimdi bolyp otyr, – dep atap ótti E.Bólekpaev.
Bank basshysy Lázzat Ibragımova atalǵan óndiris kompanııasymen únemi yntymaqtastyq baılanysta ekenin aıtty.
– Bul baǵdarlamanyń basty artyqshylyǵy – bastapqy jarnasy 10 paıyzdy qurasa, jyldyq tólem mólsherlemesi – 5 paıyz. Álbette, óz ómirin óndiris salasyna arnaǵan jas mamandar úshin óte qolaıly. Biz ERG-men birinshi jyl jumys istep otyrǵan joqpyz, osyndaı yntymaqtastyqtyń nátıjesi júzdegen kenshilerge qýanysh syılaıdy. Ári qaraı osyndaı jumystardy júzege asyra beremiz, – deıdi L.Ibragımova.
Baǵdarlama 5 jylǵa josparlanǵan. Nesıeniń eń joǵarǵy somasy – 20 mln teńge shamasynda. Turǵyn úıge muqtaj qyzmetkerlerdiń tizimin «Shubarkól Kómir» aksıonerlik qoǵamy ázirleıdi. Jyl sońyna deıin kásiporynnyń 60-qa jýyq qyzmetkeri jeńildetilgen ıpotekany kádesine jaratpaq eken.
Eńbekkerlerdiń baspanaly bolýy úshin oblystyq bıýdjetten 400 mln teńge bólingen. Taǵy 300 mln teńgeni «Otbasy bank» jáne 400 mln teńgeni Eýrazııalyq Top (ERG – Eurasian Resources Group) jaýapkershiligi shekteýli seriktestigi ınvestısııalaıdy.
Eýrazııalyq Top tarıhy 1994 jyldan bastaý alady. Kompanııa aksıonerleri osy kezeńde el aýmaǵynda alǵashqy aktıvterin satyp alǵan. Sodan bergi ýaqytta ERG paıdaly qazbalardy óndirý jáne óńdeý salasynda ártaraptandyrylǵan jetekshi kompanııalardyń birine aınalyp úlgerdi. Atalǵan kompanııa basqa óńirlerde de osyndaı turǵyn úı baǵdarlamasyn qoldap júr. Sh.Ibragımovtyń aıtýynsha, eki jyl ishinde kompanııa jumyskerlerine 600 páterdiń kiltin tabystapty.
– Sertıfıkattardy tapsyrý kásibı mereke – Metallýrgter kúnine tuspa-tus kelgeni qýantady. Aksıonerler men kompanııa basshylyǵynyń atynan kásiporyndy damytý jolynda jasaǵan barlyq jumys úshin aqjarma alǵysymdy jetkizgim keledi. Sizderge zor densaýlyq, baıandy baqyt tileımin, – dep Sh.Ibragımov kásibı merekemen jáne aldaǵy qonystoıymen quttyqtady.
«Shubarkól kómir» kásipornyndaǵy eńbek ótili 22 jylǵa tolǵan Elmıra Qulmetova 15 jastaǵy ulyn jalǵyz ózi tárbıelep otyr. Jaqynda baspanaly bolamyz dep qýanysh qushaǵynda júr.
– Men qazir ortalyq qoımanyń qoımashysy bolyp jumys isteımin. Osy ýaqytqa deıin ata-anammen birge turyp keldik. Jeke páter satyp alýǵa múmkindik bolmady. Osy baǵdarlamaǵa uıytqy bolǵandarǵa úlken rahmetimdi aıtamyn. Endi ulym ekeýmizdiń óz baspanamyz bolady. Ol kásiptik-tehnıkalyq kolledjge túspekshi. Baspana – basty másele. Bul – jas kenshiler otbasylaryn qoldaýǵa, óndiris salasyn órkendetýge, kenish oshaqtaryna kánigi mamandardy tartýǵa yqpal etetin óte tıimdi baǵdarlama. Biz óndiris adamdary retinde kórsetilgen qoldaýǵa óte rızamyz, – deıdi E.Qulmetova.
Injener-tehnolog Nursultan Badan kásiporynda 6 jylǵa jýyq jumys isteıdi. Buǵan deıin Qaraǵaıly aýylynda ata-anasymen birge turyp kelgen. О́ziniń jeke úıin kópten armandaǵan eken.
– Qaraǵandy tehnıkalyq ýnıversıtetin támamdap, birden «Shubarkól Kómir» kompanııasyna jumysqa turdym. Bul jerde eńbek etip, ósip-óngim keldi. Ári turǵyn úı sertıfıkattary beriletinin bilip, birden qatysýǵa sheshim qabyldadym. Baǵymyz janyp, tapsyrǵan ótinishim maquldanypty. Endi men eki bólmeli páter satyp ala alamyn. Otbasyma qolaıly jerdi de qarastyryp qoıdyq, – dep aǵynan jaryldy 28 jastaǵy tehnolog.
Qaraǵandy oblysynda kenshiler men metallýrgter úshin jeńildetilgen ıpoteka ótken jyly bastalǵan. Byltyr baǵdarlama ıgiligi arqyly 134 otbasy baspanaly boldy. Jeńildetilgen ıpotekany Saran, Abaı, Shahtınsk jáne Temirtaý syndy qanattas qalalardan da alý múmkindigi qarastyrylyp jatyr. Ipotekaǵa qatysýshylardy iriktegennen keıin qujattar bankke joldanady. Bıyl 75 otbasy úı alady dep josparlanyp otyr.
Qasymhan ǴALYM,
«Egemen Qazaqstan»