Astana qalasynyń ákimi Jeńis Qasymbek Instagram paraqshasynda qurylysy uzaqqa sozylǵan nysandar týraly aıtty, dep habarlaıdy Egemen.kz.
«Qaladaǵy qurylysy uzaqqa sozylǵan nysandardy aralaýdy ary qaraı da jalǵastyramyz. «Qorǵaljyn kvartaly», «Mırnyı dom», «Arabı 2 – Granıtnyı 2», «Zere-2», «Arystan», «Future Home», «Sadovye kvartaly», «Terrıtorııa komforta-1 2-kezek» turǵyn úı keshenderiniń úleskerlerimen kezdestim. Úleskerlermen birge qurylys barysyn baqylaýda ustaımyz.
Qurylysy uzaqqa sozylǵan ǵımarattardyń jaǵdaıy ártúrli. Bir jerinde úıdiń tek jaqtaýy ǵana bar bolsa, endi bir tusynda tek qazanshuńqyry ǵana qazylǵan. Máselen, «Arystan» turǵyn úı kesheniniń qurylysy 11 jyl buryn bastalǵan. Al nysandy ótkizý kezinde tek 20-30%-y ǵana daıyn edi. «Sadovye kvartaly» turǵyn úı kesheni 8 jyl buryn problemaly dep tanylsa, nysandy ótkizý kezinde irgetasy ǵana bolatyn! Myńdaǵan úlesker otbasy baspanasyn kútip júr», dep jazdy Jeńis Qasymbek.
Ákimniń jazýynsha, Memleket basshysynyń tapsyrmasyna sáıkes, qurylysy uzaqqa sozylǵan nysandardy aıaqtaý boıynsha aýqymdy júıeli jumys júrgizilip jatyr. Ár úı boıynsha qadamdyq is-sharalar jospary bar. Bıyl qurylysy uzaqqa sozylǵan 30 turǵyn úı keshenin aıaqtaý josparda bar. Bul – shamamen 4 myń úlesker otbasy. Olardyń bir bóligi aıaqtaldy.
«Úleskerler kezdesýlerde abattandyrý, ınjenerlik jeliler salý jáne t.b. máselelerdi kóteredi. Biz óz tarapymyzdan merdigerlerge barynsha kómek kórsetemiz. Degenmen olardyń úleskerlerdi jalǵan ýádemen úmittendirýine jol bermeımiz.
Bizdiń mindetimiz – uzaq qurylystardy aıaqtaý jáne úleskerlerge páter kiltin tapsyrý», dep jazdy qala ákimi.