Qonaev qalasynda I Halyqaralyq medıa jáne týrızm forýmy ótti. Eki kúnge sozylǵan is-sharany «Túrkitildes jýrnalıster qory» qoǵamdyq qory, Almaty oblysynyń ákimdigi, Aqparat jáne qoǵamdyq damý mınıstrligi jáne Mádenıet mınıstrligi birlesip uıymdastyrdy. Álemniń jetekshi BAQ ókilderi men otandyq mass-medıa jýrnalısteriniń basyn qosqan aıtýly forýmǵa Aqparat jáne qoǵamdyq damý mınıstri Darhan Qydyráli jáne Almaty oblysynyń ákimi Marat Sultanǵazıev qatysty.
Osylaısha Qonaev qalasynda ótken forým Qazaqstan, Ulybrıtanııa, Shveısarııa, Avstrııa, Belgııa, Germanııa, Fransııa, Nıderland, Moldova, Soltústik Kıpr, Túrkııa, О́zbekstan, Ázerbaıjan, Qyrǵyzstan sııaqty shet memleketterden kelgen 200 medıa mamannyń basyn qosty. Forýmnyń ashylýynda Aqparat jáne qoǵamdyq damý mınıstri Darhan Qydyráli, Almaty oblysynyń ákimi Marat Sultanǵazıev jáne «Túrkitildes jýrnalıster qory» qoǵamdyq qorynyń basshysy Názııa Joıamergenqyzy sóz sóıledi. Áýeli sóz alǵan oblys ákimi Marat Sultanǵazıev sheteldik týrıster úshin eldiń jaǵymdy kelbeti men senimin qalyptastyrýdyń erekshe mańyzdy ekenine toqtaldy.
«Almaty oblysy barlyq eldiń jýrnalısterimen ózara yntymaqtastyq ornatý máselelerinde ashyq ekenin áldeneshe ret tanytty jáne bul ustanymynan aınymaıdy», – dedi Almaty oblysynyń ákimi.
Al is-sharany uıymdastyrýshy, «Túrkitildes jýrnalıster qory» qoǵamdyq qorynyń prezıdenti Názııa Joıamergenqyzy pandemııadan keıin álemde týrızm qaıta qalpyna kelip qana qoımaı, qarqyndy damyp kele jatqanyn, byltyr bul saladan túsken tabys 50 paıyzǵa artyp, 1 trln dollarǵa jetkenin aıtty.
«Almaty oblysy – ejelgi qazaq salt-dástúrleri, ǵuryptary men tarıhy damyǵan negizgi aımaq. Sol sebepti forýmdy bıyl osy oblysta uıymdastyrdyq. Tamyz aıynda munda Antalııadan jýrnalıster keledi dep josparlap otyrmyz. Sonymen qatar, aımaq basshysynyń qoldaýymen taǵy bir úlken is-shara ótedi. Onda týrızmdi damytý, ınvestısııa tartý sııaqty máseleler qaralady. Shetelge shyqqan jaqsy, degenmen Qazaqstannyń ózinde saıahattaýǵa bolatyn oryndar jeterlik. Sondyqtan da ishki týrızmdi damytý maqsatynda áleýmettik jelilerde elimizdiń tabıǵatyn keńinen nasıhattap, kórsetýge shaqyramyn», dedi Názııa Joıamergenqyzy.
Sondaı-aq, Aqparat jáne qoǵamdyq damý mınıstri Darhan Qydyráli forýmda sóılegen sózinde týrızm salasyn damytý men týǵan jerdiń tabıǵatyn nasıhattaýdaǵy aqparattyq qoldaýdyń mańyzdylyǵyn aıtty.
«Bizdiń baı dalamyzda asqar taý-asaý ózender de, jynys orman da, aınadaı kólder de, qumdy shólder de jeterlik. Osy Almaty oblysynyń ózinde jurtqa tanys Sharyn shatqaly, Úlken Almaty kóli, Túrgen sarqyramalarynan ózge Aıǵaı qum, Burhan-Bulaq sarqyramasy, Aqbulaq, Oıqaraǵaı, Tabaǵan, túrki dáýiriniń biregeı eskertkishi Tamǵaly tas sııaqty qanshama ǵajap jerler bar. Biz osy sulý jerimizdi kórsetip, ár jerdiń ózgeshe tabıǵatyn, óz ereksheligin túsirip, nasıhattaǵan jón dep oılaımyz. Osyǵan baılanysty arnaıy derekti fılmder jelisin túsirýdi josparlap otyrmyz. Sonymen qosa, ekologııalyq saýattylyq, demalys mádenıeti, ekojúıemen úılesim máselelerin de únemi nazarda ustaǵan abzal. Biz qazir serıaldarymyzda osy týraly kóbirek kórsetip, múmkindiginshe elimizdiń baı tabıǵatyn retimen nasıhattaýǵa tyrysyp kelemiz. Qysqasy, BAQ salasy el týrızminiń de baǵyna aınalýǵa tıis dep sanaımyz», dedi óz sózinde mınıstr.
Eki kúnge sozylǵan bul forým «Týrızm men jańa kommýnıkasııalardy damytýdaǵy BAQ-tyń mańyzy», «Qazaqstandaǵy týrızm: damý keleshegi men múmkindikter», «Medıa. PR jáne týrızm ındýstrııasy», «Sıntetıkalyq medıa: kontent qalyptastyrýdaǵy neırojúıe» syndy taqyryptardy qamtydy. Sondaı-aq, forým aıasynda «Myń boıaýly aspan» áýe sharlary festıvali ótti. Qonaev qalasynda alǵash ret álemniń túkpir-túkpirinen ákelingen 30 shar aspanǵa kóterilip, jınalǵandardy jarqyn áserlerimen qýantty. Bul shar festıvalin uıymdastyrýshylardyń basty maqsaty – qaldyqtardy bólek jınaý, qaıta óńdeý, ekologııalyq taza qaıta óńdeýge bolatyn ydys-aıaqtar men basqa da ekomaterıaldardy paıdalaný arqyly tabıǵatqa jáne onyń resýrstaryna qurmetpen qaraýdy nasıhattaý eken. Festıvalde Almaty oblysynyń ákimi Marat Sultanǵazıev quttyqtaý sóz sóıledi.
«Oblysta týrızmdi ilgeriletý jáne damytý oqıǵaly týrızmine negizdelgen. Osyǵan oraı, «Konayev international balloon fest» shar festıvaliniń is-sharasy bizdiń óńirimizdegi aıtýly oqıǵa bolmaq, bul bizdiń qonaqtarymyz úshin tabıǵattyń sulýlyǵyn tamashalaýǵa tamasha múmkindik bolyp tabylady jáne siz munda bir-birińizben tanysýǵa, dostyq qarym-qatynas ornatýǵa jáne umytylmas áser alýǵa ýaqyt tabasyz. Tańǵy saǵat 5-ten bastap festıvalge jınalǵan kórermender osyndaı sulýlyqty tamashalaýǵa shabyttandy, tipti saǵat 7-ge taman sharlarmen bıiktikke shyǵýǵa nıet bildirgenderdiń úlken kezegi paıda boldy. Iаǵnı, osy arqyly biz oqıǵaly týrızmniń jumys isteı bastaǵanyn kórsetemiz. Biz bul sharaǵa 6 aı boıy daıyndaldyq, taldaı kele, Qazaqstanda áýe sharyna arnalǵan is-sharalar bolmaǵanyn kórdik. Áleýmettik jeli qoldanýshylary túsiniktemelerde Qonaev turǵanda Kappadokııaǵa barýdyń qajeti joq dep jazyp jatyr» dedi óz sózinde aımaq basshysy.
Forýmǵa aımaqtardan arnaıy kelgen áriptester Almaty oblysynyń kórikti jerlerin aralady. Týrıstik nysandardy kórip, kózaıym bolǵan jýrnalıster aq jarma lebizderin de bildirdi. Máselen «Aqtóbe Medıa» jaýapkershiligi shekteýli seriktestiginiń dırektory Raýken Otynshın Almaty oblysynyń týrıstik áleýeti zor ekenin aıtady.
«Qazaqstanda týrızm salasy kenjelep turǵany jasyryn emes. Onyń ústine, týrıstik oryndar azdaý, bar bolǵan kúnniń ózinde, qazaqstandyqtar elimizdi aralaı bermeıdi. Dese de, biz osy forýmnyń aıasynda Túrgenniń tórine, Kólsaı kóline, Sharyn shatqalyna baryp, oblystyń týrıstik áleýeti zor ekenine kózimizdi jetkizdik. Kórikti jerlerdi aralap, kózaıym boldyq. Mundaı sharalar kóptep uıymdastyrylsyn deý artyqtaý, biraq, tilshilerdiń bas qosyp turýy kerek-aq», deıdi Raýken Otynshın.