Qazaqstanda kókparshy qyz Eva Jıgalına jaıynda «Eva. Batyr qyz» atty derekti fılm túsirildi. Bul – bala kezinen saıyn dala tósinde jelmen jarysyp, tabıǵattan esken erkindikke erkelep ósken tabandy qyzdyń jany qalaǵan súıikti isimen aınalysý haqy úshin kúresi týraly oqıǵa.
Dástúrli qoǵamda áıelge kókparǵa qatysýǵa qatań tyıym salynǵan. Biraq Eva qıyndyqtarǵa moıymastan tabandylyq tanytyp, qalyptasqan qasań qaǵıdalardy buzdy, áleýmettik jáne mádenı tosqaýyldardy eńsere bildi. Ol «kókpar – tek erlerdiń oıyny» degen myqtylarmen teketireste boldy. Degenmen Evany qoldaıtyndar da tabylyp, onyń jigerine, armanyna, adal minezine laıyqty baǵasyn berip, jigerlendirip, tosqaýyldarǵa tótep berýine kómegin aıamady. Eti tiri Eva kádimgi bilek kúshinen de, eptilikten de kende emes, al onyń ishki tegershiginiń myqtylyǵy, jalyny men tabandylyǵy kórgen adamnyń kóńilin eriksiz qanattandyrady.
Fılm kórermendi emosııalyq saıahatqa úıirip áketip, keıipker jolynda kezdesken qıyndyqtardy, onyń sáıgúlikke degen mahabbatyn qyzyqty mysaldarmen baıandaı jóneledi.
«Ata-anam kókparǵa qatysýǵa tyıym salǵan. Biraq bir jerde kókpar bolyp jatyr dese, degbirim qashyp, delebem qozyp, úıden qashyp ketetinmin. Kókparǵa alǵash ret 15 jasymda qatystym. Shaqyrýsyz barǵan edim. О́zim de tańǵaldym. Atta otyryp, erlerdiń kókparda jan alyp, jan bergenin kórdim. Olarǵa qosyla ketip, serkeni julyp alyppyn. Erler meni qýa jóneldi, biraq ustatpaı kettim. Qazir jurttyń kókparǵa qyzyǵýy artqanyn kórip júrmin. Maǵan uldar da, qyzdar da hat jazyp, kókpar tartýdy úıretshi dep ótinip jatady», deıdi Eva Jıgalına.
«Eva. Batyr qyz» derekti dramasy – Temirbek Amanjoldyń alǵashqy rejısserlik qadamy. Temirbektiń ózi de tulparmen týrızmdi nasıhattap, atqa miný mádenıetin zerttep júr. «Evanyń hıkaıasy – salt-dástúr, jiger men qurbandyq shıelenisken álemge jeteleıtin shytyrman saıahat. Osyndaı qym-qýyt álemde názik jan aǵysqa qarsy júzip, mahabbat pen jalynnyń almaıtyn qamaly joǵyn aıshyqtaıdy», deıdi ol.
«12 jyldan beri jylqy janýaryn fılmderge túsirip, atqa miný mádenıetin, neonomadızmdi zerttep júrmin. «Eva. Batyr qyz» fılminde qazaqylyqtyń formýlasyn pash etkim keledi. Eli bóten, dini bóten basqa jurttyń balasy nelikten osy oıynǵa qumar bolyp, bar ómirin sarp etýge sert berdi? Kókpar men Qambar ata janýary nesimen tartymdy? Bul fılmdi osy suraqqa jaýap izdeıtin zertteý deseńiz de bolady», deıdi Temirbek Amanjol.
Fılmniń podıýseri Dýman Qojahmettiń aıtýynsha, bul týyndynyń halyqaralyq deńgeıge shyǵýǵa áleýeti mol. «Qazir birneshe sheteldik strımıng-servıstermen prokat týraly kelissózder júrip jatyr», deıdi ol.
Derekti fılmdi «Black & White Production» kompanııasy Mádenıet jáne sport mınıstrliginiń tapsyrysymen jáne Ulttyq kınony qoldaý memlekettik ortalyǵynyń qoldaýymen 2022 jyly túsirdi.