Oqý-aǵartý mınıstriniń tapsyrmasy boıynsha orta bilim berý komıteti Almaty oblysynyń 11 mektebiniń kúrdeli jóndeýine monıtorıng júrgizdi. Jumys sapary barysynda mınıstrlik ókilderi belgilengen merzimde jumystardy sapaly aıaqtaý týraly usynymdar berdi, dep habarlaıdy Egemen.kz Oqý-aǵartý mınıstrliginiń resmı saıtyna silteme jasap.
Orta bilim berý komıtetiniń málimdeýinshe, jóndeýden ótip jatqan mektepterdiń kóbi 70-80 jyldardyń basynda salynǵan. Olardyń qatarynda Qonaev qalasynyń Q.Qaısenov atyndaǵy №4, Ile aýdany Ekpendi aýylynyń №2 orta mektepteri, Eńbekshiqazaq aýdany Esik qalasynyń A. Malkeev atyndaǵy Bilim-ınnovasııa lıseıi, Shelek aýylynyń Abaı atyndaǵy, Esik qalasynyń Abylaıhan atyndaǵy №4 orta mektepteri, Qaskelen qalasynyń Q. Sátbaev atyndaǵy mektebi, Kegen aýdanynyń Jańabaev atyndaǵy, Talǵar aýdanynyń K.Nurpeıisov atyndaǵy, №10, № 12 orta mektepteri bar. Qazirgi ýaqytta barlyq 11 bilim berý nysandarynda demontaj jáne seısmıkalyq kúsheıtý jumystary júrgizilip jatyr.
«Orta bilim berý komıteti men mınıstrliktiń aýmaqtyq bólimsheleri birlesip mektepterdiń jańa oqý jylyna daıyndyq deńgeıine monıtorıng júrgizdi. 11 bilim berý obektisinde keshendi jóndeý jáne mektep aýmaǵyn abattandyrý boıynsha jumystar júrgizilip jatyr. Olardyń basym bóliginde jóndeý jumystary maýsym aıynda bastalǵan edi. Shartqa sáıkes aıaqtalý merzimi 6 aıdan 11 aıǵa deıin sozylýy múmkin, ıaǵnı oqý jylynyń basynda mektepter balalardy qabyldaýǵa daıyn bolmaıdy. Biz bilim basqarmasymen birlesip oqý-tárbıe prosesin uıymdastyrý úshin bilim alýshylardyń ýaqytsha ornalasý oryndaryn belgiledik. О́z kezeginde merdiger uıymdar jóndeýdi belgilengen merzimnen buryn aıaqtaýǵa daıyn», dep atap ótti Orta bilim komıteti basqarmasynyń basshysy Gúlnar Talasbaeva.
Orta bilim komıtetiniń usynymdary boıynsha bilim basqarmasy men mektepter ár bilim ordasy boıynsha modıfıkasııalaý josparyn ázirledi. Bilim basqarmasyna jaqyn ornalasqan basqa mektepterdiń jobalyq qýattylyǵyn eskere otyryp, barlyq oqýshylardy oqytýmen qamtamasyz etý boıynsha tapsyrma berildi. Sondaı-aq ata-analarmen, pedagogıkalyq qoǵamdastyqpen aqparattyq-túsindirý jumystaryn júrgizý, jumystardy belgilengen merzimde sapaly aıaqtaý, jóndeý jumystarynyń barysyn qadaǵalaıtyn monıtorıngtik jumys toptaryn qurý boıynsha usynystar berildi.
Aıta ketý kerek, mınıstrlik elimizdiń basqa da óńirlerindegi bilim berý uıymdarynda monıtorıng jumysyn jalǵastyratyn bolady.