Magıstratýraǵa keshendi testileý bastalǵaly 23 myńǵa jýyq adam emtıhan tapsyrsa, olardyń 43 paıyzy shekti ball jınady. Ortasha kórsetkish – 73 ball. Eń joǵary ball – 130. Bul aralyq málimetterdi Ǵylym jáne joǵary bilim mınıstrligi jarııa etti, dep habarlaıdy Egemen.kz.
«Ulttyq biryńǵaı testileýdegi sekildi Keshendi testileýge kirgizý úsh deńgeıli júıe boıynsha júzege asyrylady: Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý júrgiziledi. Qabyldanǵan sharalar arqasynda testileýde bógde tulǵalar anyqtalǵan joq», dedi Ulttyq testileý ortalyǵynyń dırektory Rýslan Emelbaev.
Aıta keteıik, testileý bastalǵaly 149 qatysýshynyń nátıjesi joıylǵan. Onyń ishinde 92 adam smartfon, shpargalka jáne basqa da tyıym salynǵan zattardy alyp ótýge tyryssa, testileý kezinde erejelerdi buzǵany úshin aýdıtorııadan 57 adam shyǵarylǵan.
Esterińizge sala keteıik, bıyl magıstratýraǵa arnalǵan keshendi testileý 10 tamyzǵa deıin jalǵasady.