Pıreneı túbeginde uıymdastyrylǵan velosporttan bir kúndik «Circuito Getho» jarysynda «Astana» komandasynyń ókili Alekseı Lýsenko jeńimpaz atandy.
2017 jylǵy «Ispanııa Výeltasy» men 2020 jylǵy «Týr de Franstyń» bir kezeńinde úzdik shyqqan A.Lýsenko bıylǵy maýsymda osymen ekinshi ret halyqaralyq týrnırdiń jeńis tuǵyrynan kórinip otyr. Buǵan deıin ol sáýir aıynda Italııada ótken «Djıro dı Sısılııa» dodasynda qarsylastaryn shań qaptyryp, bas júldeni oljalaǵan bolatyn.
Al kúni keshe Bılbao men Getcho qalalaryn jalǵaǵan bir kúndik jarysta Lýsenko 193,3 shaqyrym qashyqtyqty 4 saǵat 19 mınýt 10 sekýndta eńserip, máre syzyǵyn birinshi bolyp kesti. Ekinshi oryndy «Lidl-Trek» komandasynyń fransııalyq ókili Tonı Gallopın enshilese, úshinshi oryn «Astananyń» ıtalııalyq taǵy bir veloshabandozy Sımone Velaskoǵa buıyrdy.
Sondaı-aq «Astana» sapynda óner kórsetken jerlesterimiz Evgenıı Fedorov pen Nurbergen Nurlyqasym márege 20-shy jáne 55-shi bolyp jetti.