Qaraǵandy oblysynda arnaıy ortalyqtan 12 bala ýlanyp aýrýhanaǵa jetkizildi. Bir bala medısınalyq mekemede qaıtys boldy, taǵy altaýy jansaqtaý bólimine jatqyzyldy. Balalardyń ýlanǵany týraly aqparatty oblys ákimdiginiń baspasóz qyzmeti rastady, dep habarlaıdy Egemen.kz.
Qaraǵandy oblysyndaǵy múmkindigi shekteýli balalarǵa arnaýly áleýmettik qyzmet kórsetý ortalyǵynda jappaı ýlaný faktisi tirkeldi. Saldarynan bir bala qaıtys bolyp, taǵy altaýy jansaqtaý bóliminde jatyr.
Aýrýhanaǵa barlyǵy 12 bala jetkizilgen. Olardyń jaǵdaıyn dárigerler asa aýyr dep baǵalap otyr. Jansaqtaý bóliminde jatqandardyń barlyǵy ókpeni jasandy jeldetý apparatyna qosylǵan.
Balalardyń halin bilý úshin oblys ákimi Ermaǵanbet Bólekpaev aýrýhanaǵa bardy. Densaýlyq saqtaý basqarmasynyń basshylyǵymen jáne emdeýshi dárigerlermen jedel keńes ótkizdi. Oqıǵanyń sebepterin anyqtaý úshin arnaıy komıssııa quryldy.
Resmı málimetke sáıkes, bul fakti boıynsha qylmystyq is qozǵalyp, Qaraǵandy oblysynyń arnaıy prokýrorlar basqarmasyna berildi. Arnaıy mekeme dırektorynyń mindetin atqarýshy qyzmetinen bosatyldy.