Shymkent qalasynyń Bilim basqarmasynda qyzmet etip, júıeli túrde jemqorlyqpen aınalysqan laýazymdy tulǵalar jaýapkershilikke tartyldy, dep jazady Egemen.kz QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
Shymkent qalasynyń qylmystyq ister jónindegi aýdanaralyq soty bilim basqarmasynyń mamandary A. Shındaýlova men M. Meıirbekovaǵa qatysty úkim shyǵardy.
Atalǵan adamdarǵa 36 mln teńge kóleminde aıyppul salyndy.
«Olar jekemenshik mektepke deıingi mekemelerde tekseris júrgizbegeni úshin 100 myńnan 500 myń teńgege deıingi somada mektepke deıingi mekemelerdiń basshylarynan júıeli negizde para alǵany úshin kináli dep tanyldy. Sottalǵandar memlekettik qyzmette, jergilikti ózin-ózi basqarý organdarynda, qarjy uıymdarynda jáne kvazımemlekettik sektorda qyzmet atqarý quqyǵynan ómir boıyna aıyryldy. Sot úkimi zańdy kúshine engen joq», delingen ANTIKOR habarlamasynda.
Budan basqa, bilim berý salasyndaǵy jemqorlyq táýekelderin syrtqy taldaý barysynda bıýdjet qarajatyn jymqyrý shemasy anyqtaldy. Dálirek aıtqanda, eki qalalyq mekteptiń býhgalteri 2020-2023 jyldar kezeńinde óziniń jeke shotyna mektep qyzmetkerlerine eńbekaqy tóleý qoryna bólingen 67 mln teńgeden astam qarajatty zańsyz aýdarǵan.
Jymqyrýdyń uqsas shemasy №2 mektepte qoldanyldy, onda 6 jyldan astam ýaqyt boıy dırektor, bas menedjer jáne bas býhgalter birlesip jumys istegen.
Shymkent qalasy boıynsha Sybaılas jemqorlyqqa qarsy qyzmet qalalyq bilim berý salasyndaǵy buzýshylyqtardyń alǵysharttaryn joıý boıynsha tıisti usynymdar engizdi.