Qazirgi ýaqytta Astananyń jeke sot oryndaýshylarynyń (JSO) óńirlik palatasynda 244 JSO jumys isteıdi, dep habarlaıdy Egemen.kz elorda ákimdiginiń resmı saıtyna silteme jasap.
Astana qalasynyń Ádilet departamenti basshysynyń orynbasary Azamat Aınabekov JSO-ǵa qatysty júrgizilgen tekserýler týraly Astananyń kommýnıkasııalar qyzmetinde ótken brıfıngte aıtty.
Jyl basynan beri Departament jeke sot oryndaýshylarynyń qyzmetine 149 jospardan tys jáne 75 josparly tekserý júrgizdi. Nátıjesinde 99 JSO tártiptik jaýapkershilikke tartyldy, úsheýi lısenzııasynan aıyryldy, TJK lısenzııalarynan aıyrý týraly taǵy eki usynys QR Ádilet mınıstrliginiń qaraýynda.
Aıta ketý kerek, Astanadaǵy jeke sot oryndaýshylary ekinshi deńgeıli banktermen, olardyń kásiporyndarymen, qarjy jáne saqtandyrý uıymdarymen, páter ıeleriniń kooperatıvterimen jasalǵan kelisimder negizinde atqarýshylyq is júrgizedi.
«Qazaqstan Respýblıkasynyń «Atqarýshylyq is júrgizý jáne sot oryndaýshylarynyń mártebesi týraly» Zańyna sáıkes alıment óndirip alý týraly atqarýshylyq qujattar áleýmettik mańyzy bar sanat bolyp sanalady. Qazirgi ýaqytta alıment óndirip alý qoǵamdaǵy ózekti másele bolyp sanalady. Astana qalasynyń jeke sot oryndaýshylary alıment óndirip alý týraly 19 890 atqarýshylyq is qozǵady, onyń ishinde 9 915 atqarýshylyq is júrgizý boıynsha boryshkerlerdiń jalaqysynan aı saıyn ustap qalý júrgizilýde, 618 atqarýshylyq is júrgizý boryshkerlerdi izdestirýge jarııalaýǵa baılanysty toqtatyldy», dep habarlady spıker.
Ádilet departamenti qala prokýratýrasymen jáne jeke sot oryndaýshylarynyń óńirlik palatasymen birlesip osy baǵytta úlken jumys atqardy.
Máselen, 6 boryshker qylmystyq jaýapkershilikke tartyldy, 79 boryshker ákimshilik jaýapkershilikke tartyldy, sondaı-aq jyl basynan beri 600-ge jýyq boryshkerden 358 mln teńge mólsherinde bereshek óndirildi. Jyl basynan beri jumyssyz boryshkerlerdi jumysqa ornalastyrý maqsatynda 10 jármeńke ótkizilip, nátıjesinde 21 adam jumys tapty. Mundaı jumys jármeńkeleri aı saıyn uıymdastyrylady.