Men – jeti jastaǵy Ázız Jambyldyń naǵashy ájesimin. Biz Batys Qazaqstan oblysyndaǵy Kaztalov aýdanynyń Kókterek aýylynda turamyz. Men «Egemen Qazaqstan» gazeti arqyly ózim men jıenimniń anasy, ıaǵnı qyzym Nurly Seıfollaqyzynyń atynan Aqtóbedegi «Ana men balany qorǵaý» ortalyǵynyń mamandaryna alǵysymdy bildirgim keledi.
Ázız bes jasynan bastap tamaqty qınalyp ishetin. О́tken jyly qara sý da tamaǵynan durys ótpeıtin bolǵan soń dárigerler Oral qalasyndaǵy balalar aýrýhanasyna jatqyzdy. Bul jerde balanyń óńeshi tarylǵan, operasııa jasaý kerek dep sheshti. Sodan Aqtóbedegi atalǵan ortalyqqa portal arqyly kezekke turdyq. Kezegimiz kóp kúttirmeı kelip, Aqtóbege jol tarttyq. «Ana men balany qorǵaý» ortalyǵynda úsh aıǵa jýyq jatyp emdelip, operasııa jasaldy. Aýrýhanadan shyqqan soń bes-on kún saıyn tekseristen ótip turdyq. Qazir jıenimniń jaǵdaıy edáýir jaqsardy, bir jarym aıda tekserýge kelip turamyz.
Ári-sári kóńil kúıde kelgen bizge aqtóbelik dárigerler úmit syılady. «Ana men balany qorǵaý» ortalyǵynyń bas dárigeri Erbol Japaqov, bólim meńgerýshisi Marat Ilıasov, dárigerler – Janna Egılova, Aınur Dáýlenova, Qaırat Jalmuhambetov, Baýyrjan Bısalıev, bas medbıke Aıgúl Japarova, medbıkeler – Gúlzıra Nurǵalıeva, Daıratgúl Maqanova, Valentına Sársenova syndy qoly shıpaly, júregi meıirimge toly mamandarǵa alǵystan basqa aıtarymyz joq. Ujymnyń aqylshysy, professor Bolat Janalaev jany qınalyp kelgen sábıdi saýyqtyrǵan tamasha maman, úlken júrekti azamat eken. Kimmen de bolsyn óte sypaıy sóılesetin emdeýshi dáriger Baýyrjan Bısalıev týraly da osylaı demekpiz.
Alań kóńil bolyp kelgen ata-anaǵa jyly sózdiń ózi úlken demeý ǵoı. Rahmet, aq jeleńdi abzal jandar!
Raıa JUMAGEREIQYZY
Batys Qazaqstan oblysy,
Qaztalov aýdany