«Jeruıyq kórem deseń, Kegenge kel!» dep aqynyna shabyt syılaǵan saıaly mekenniń kórkin asyryp, aýyldyń ajaryn ashqan Jastar saıabaǵyna aǵylýshylar legi jaz boıy tolastamaı tur.
Sonaý 2016 jyly irgesi qalanǵan saıabaqtyń qurylysy quldyrap, ıgi istiń aıaqtalýyn aýyl turǵyndary uzaq kútkeni jasyryn emes. Sol sebepti aýdan ortalyǵynda demalyp, saıalaıtyn mádenı orynnyń joqtyǵyna jıi shaǵymdanatyn.
– Kegen aýyldyq okrýgi ákiminiń apparatynyń teńgerimine 76 mln 329 myń teńge qaldyq qunymen qabyldanǵan saıabaqty jóndeý, kútip, baptaýǵa aýyldyq okrýg ákiminiń bastamasymen 2022 jyly jalpy quny 5 mln 875 myń teńge qarajat bólinip, ashyq konkýrs jarııalanǵan. Nátıjesinde, «Damý Elkom Qurylys» JShS saqaldy qurylysty qolǵa alyp, sapaly jóndeý jumystaryn júrgizdi. Osy jyly Jastar saıabaǵy men Raıymbek kóshesinde ornalasqan alleıaǵa 500 metr jerge sý jetkizý men kútip-baptaýǵa ashyq konkýrsty «M-Modýl KZ» JShS (3 mln 800 myń teńge) jeńip alyp, saıabaqty kútip-baptaý jumystaryn júrgizip jatyr, – deıdi Kegen aýyldyq okrýginiń ákimi Rýslan Masenov.
Bıylǵy jazda aýyl jurtshylyǵy, ásirese jastar atalǵan saıabaqtan saıa taýyp, keshqurym qydyrystaýdy ádetke, tipti sánge aınaldyrǵan. Saıabaqtyń shamdary samaladaı jarqyrap, oıyn alańdary balalardyń kúmis kúlkisine bólengen. Balalardyń qaýipsizdigi basty nazarǵa alynyp, oıyn alańdaryndaǵy jasandy tósenish jasyl kilemdeı jaınap, demalys alańyn qulpyrta túsken. Munda kóz jaýyn alatyn gúlzar da bar.
– Árkimge týǵan jeri qut-meken, altyn besik qoı. Aýdan ortalyǵy sanalatyn Kegendegi betke ustar saıabaqtyń qanshama jyl boıy qaraýsyz qalyp, ishine mal jaıylyp júretini janymyzǵa batatyn. Mine, janashyr, isker azamattardyń arqasynda kóptiń kókeıinde júrgen bul problemanyń túıini tarqatylyp, túgeldeı jasalyp, qorshalyp, jaryqtandyrylyp, balalar úshin batýttar qoıylyp, halyqqa qýanysh syılady. Jaz boıy úıden uzamaıtyn nemese taý-tas kezip ketetin bala-shaǵanyń bárin osy aradan kóretin boldyq. Osyndaı mádenı oshaqtar kóptep boı kóterip, aýylymyzdyń kórki kirse, jastardyń da qalaǵa qashpaı, turaqtaýyna sebi tıeri sózsiz, – deıdi Kegen aýyldandyq aqsaqaldar alqasynyń tóraǵasy Sabyr Dosymbekov.
«Biter istiń basyna, jaqsy keler qasyna» degen. Alaqandaı aýyldyń tynys-tirshiligine, túıtkildi máselelerine basa nazar aýdarǵan aýyl ákimi Rýslan Keńesjanuly aýdan ortalyǵyndaǵy Atyhanuly atyndaǵy kóshede ornalasqan, jarty ǵasyrdan beri jóndeý kórmeı, toz-tozy shyqqan ekiqabatty turǵyn úı turǵyndarynyń san jylǵy bazynasyna qulaq túrip, shatyryn jańalap, ishi-syrtyn syrlap, sóıtip jyrtyǵynyń bútindelýine muryndyq bolǵan.
– 1968 jyly salynǵan bul úıde 24 otbasy turatyn edik. Sodan beri tozyp, túgi qalmaýǵa aınalǵan. Tóbeden ótken jańbyr, tómengi qabatqa sorǵalaıtyn. Ishin kóktiń ıisi alyp, kópshiligi tura almaı kóship, páter kezip ketti. Muń-zarymyzdy qansha jyldan beri jyrlap kelemiz?! Áıteýir únimizdi estıtin úkimet bar eken. Aýyl ákiminiń basshylyǵymen byltyr tamyz aıynan bastap bizdiń turǵyn úıge kúrdeli jóndeý jumystary jasaldy. Bas-aıaǵy eki aıdyń ishinde qosqabatty úıimizdiń kórki kirip, kóz súısinerlik kúıge ózgerdi. Tenderdi utyp alǵan «Kazstroı grýpp»-tyń isker azamattaryna, bilikti jumysshylarǵa alǵysymyz sheksiz. Búginde úıge kelgen qonaqtan uıalmaıtyn boldyq. Eńsemiz kóterilip, shańyraǵymyz shýaqtanyp qaldy, – dep aǵynan jaryldy osy úıdiń turǵyny Dárııa Ǵumyr.
Kegen aýylynda jalpy kópqabatty turǵyn úıler sany 14 bolsa, bıyl taǵy tórteýiniń shatyrlary jańartylyp, aǵymdaǵy jóndeý jumystary jalǵasýda. Bul maqsatqa 136 mln teńge qarjy bólingen. Jan jadyratarlyq jaǵymdy isterdiń ıgiligin qarapaıym halyq kórip jatyr.