Qaraǵandy jurtshylyǵy qys túse qalany tumshalaıtyn kók tútinnen arylatyn shaq kóp kúttirmeıdi dep úmittenedi. Búginniń ózinde biraz kóshege gaz kelip tur. Endigi sharýa turǵyndarǵa tikeleı baılanysty. Kóshesine jetkizilgen gazdy úıine tartyp alý ǵana qalyp tur. Osy tusta jergilikti bıliktiń de qamsyz qarap otyrmaǵanyn atap ótýimiz kerek-aq. Paıyzsyz nesıe men áleýmettik kómek qarastyrylyp otyr. Ketetin shyǵyn esebin surasańyz, shamamen bir úıdiń 150,2 tekshe metr aýmaǵyn jylytý úshin 770 myń teńge kóleminde qarajat qajet.
Joǵaryda aıta ketkenimizdeı, jer úıdegi jurtshylyqqa gaz tartý úshin paıyzsyz nesıe beriledi. Onymen qosa áleýmettiń áljýaz tobyndaǵy qaýymǵa bir rettik áleýmettik kómek kórsetiledi. Qaraǵandy qalasynyń bıýdjetinen. Qaraǵandy tórt kezeń arqyly tolyq gazben qamtylady. Bul tórt kezeńde 16 qosý kesheni bar. 2021 jyldan beri birinshi jáne ekinshi qosý beketi tolyq aıaqtalypty. Birinshi beket arqyly Qaraǵandynyń 66 kóshesine gaz jetti. Onda 1 695 úı bar. Ekinshi bekette – 55 kóshe. Mundaǵy úı sany – 2 471. Jalpy, búginde 995 úıde gaz bar.
Atalǵan úılerdiń 1 397-si abonenttik tehnıkalyq sharttardy alǵan. Byltyrdan beri úshinshi bekette jumys qyzý júrip jatyr. Munda 38 kóshe bolsa, gaz alatyn úı – 2 852 eken.
– Birinshi pýnkttegi 66 kóshege gaz jetkizetin 55 shaqyrym, ekinshide 76 shaqyrym gaz qubyry tóseldi. О́tken jyldan bastap, úshinshi pýnkt boıynsha jumys júrip jatyr. Onda 38 kóshedegi 2 852 úıge gaz beretin 68 shaqyrym salynady. Qaraǵandy qalasy ákimdigi tarapynan turǵyndardyń jekelegen sanattaryna úılerin gazdandyrýǵa birjolǵy áleýmettik kómek kórsetiledi. Mundaı áleýmettik kómek jasy boıynsha zeınetkerlerge, múmkindigi shekteýli jandarǵa jáne múmkindigi shekteýli balalary bar, olardy tárbıelep otyrǵan otbasylarǵa, kópbalaly analar men kópbalaly otbasylarǵa, basqa memleketter aýmaǵynda jaýyngerlik áreketterge qatysqan ardagerlerge, jetim balalar men ata-anasynyń qamqorlyǵynsyz qalǵan, gazdandyrýǵa jatatyn jeke úılerde turatyn balalardyń qamqorshylaryna jasalady. Áleýmettik kómektiń mólsheri gaz jabdyǵyn jetkizýge jáne ornatýǵa baılanysty naqty shyǵyndarǵa súıenip, anyqtalady. Biraq ol 100 AEK-ten aspaıdy. Bul – 345 myń teńge, deıdi Qaraǵandy oblysynyń energetıka jáne turǵyn-úı kommýnaldyq sharýashylyq basqarmasynyń basshysy Erbol Ýálıuly.
Byltyr 8 mln teńgeden asa somaǵa 28 otbasyǵa kómek kórsetilse, bıyl jartyjyldyqta 35 otbasy alǵan. Oǵan 12 mln teńgeden asa qarajat jumsalǵan. Áleýmettik kómek alý úshin Qaraǵandy qalasynyń jumyspen qamtý jáne áleýmettik baǵdarlamalar bólimine ótinish tastaýǵa tıis.
Qaraǵandy oblysynyń turǵyn úı qoryn jańǵyrtý ortalyǵy – jeke turǵyn úılerdi gazǵa qosý jónindegi memlekettik baǵdarlamanyń operatory bolyp sanalady. Ortalyq dırektory Danııar Dúısembaev baǵdarlama arqyly bıyl 300 úıge gaz tartý josparda ekenin aıtady.
– Qaraǵandy oblysynyń turǵyn úı qoryn jańǵyrtý ortalyǵy – jeke turǵyn úılerdi gazǵa qosý jónindegi memlekettik baǵdarlamanyń operatory. Baǵdarlama boıynsha bıyl 300 úıdi qosý josparlanýda. Onyń 200 úıi – Qaraǵandyda jáne 100 úıi – Temirtaýda. Nesıeleý – 5 jylǵa deıin paıyzsyz. Bul arada algorıtm – qarapaıym. Turǵyn úıdiń quqyqtyq qujattaryn Jańǵyrtý ortalyǵyna tapsyrý qajet. О́tinish bergennen keıin «QazTransGazAımaq» AQ-dan tehnıkalyq sharttar alyp, merdigerdi tańdap, úshjaqty shart jasalady, deıdi D.Dúısembaev.
Tehnıkalyq sharttardy alý úshin myna tórt qujat qajet bolady: jeke kýálik, kadastrlyq anyqtama, tehnıkalyq tólqujat, jer aktisi.
Qasymhan ǴALYM,«Egemen Qazaqstan»