Oqý-aǵartý mınıstrliginiń tapsyrmasymen «Jaqsylyqty jasa» uranymen 1 tamyzda bastalǵan respýblıkalyq «Mektepke jol» aksııasy 30 qyrkúıekke deıin júrgiziledi, sol oraıda Jetisý oblystyq bilim basqarmasynyń málimdeýinshe oblystaǵy 15 myńnan asa balaǵa kómek kórsetý josparlanýda, dep habarlaıdy Egemen.kz.
Oblystyq bilim basqarmasynyń málimeti boıynsha, aksııa barysynda 1 synypqa qabyldanǵan oqýshylardy, sonymen birge turmysy qıyn otbasylardyń balalaryn jáne jaz mezgilinde elimizdiń basqa óńirlerinen oblysqa kóship kelgen áleýmettik kómek alýdy qajet etetin balalardy qamtý kózdelýde.
Jetisý oblysy ákiminiń baspasóz qyzmetiniń jazýynsha, «Mektepke jol» aksııasyn uıymdastyrýshy aýdandyq, qalalyq bilim bólimderi, mektepter óz qalasy men aýdandarynyń barlyq azamattaryna, kásipkerlerge, mesenattarǵa aksııaǵa qosylý turǵysyndaǵy usynystarymen júginýde. Aıta keterligi oblysta birneshe jyl qatarynan óz bastamasymen kómek kórsetetin demeýshiler bar.
Aksııa maqsaty—áleýmettik kategorııadaǵy balalarǵa oqý jylynyń bastalýyna daıyndyq kezinde materıaldyq qoldaý kórsetý. Al balalardyń mektepke kelmeýiniń aldyn alý baǵytynda ishki ister organdarymen birlesip, balalardy tolyq oqýmen qamtý maqsatynda reıdter uıymdastyrý kózdelgen.
Sonymen birge jalpyǵa mindetti bilim berý qorynan mektep oqýshylaryn mektep formasymen qamtamasyz etý jumysy da júrgizilýde.
Oblys ákiminiń baspasóz qyzmetinde «Búgingi kúni oblys boıynsha 12118 oqýshynyń ata-analarynyń kartshottaryna 491,6 mln. teńge (55,6%) qarajat aýdaryldy. Bul baǵyttaǵy jumys 10 tamyzǵa deıin aıaqtalady», delingen.