3 tamyz kúni Tarazda «Novojambýl fosfor zaýyty» JShS aýmaǵynda jarylys bolyp, saldarynan jumysshylar hımııalyq kúıik alǵan. Bul týraly aqparat áleýmettik jelide tarady, dep habarlaıdy Egemen.kz.
QR Eńbek jáne halyqty áleýmettik qorǵaý mınıstrligi 3 tamyzda «NDFZ» JShS jumysshylary deneniń ár jerinen hımııalyq kúıik alǵanyn rastady.
«Zardap shekken jumysshylar Taraz qalalyq aýrýhanasyna jetkizildi. Osy fakti boıynsha Jambyl oblysy ákimdiginiń eńbek ınspeksııasy jónindegi basqarmasy jazataıym oqıǵanyń mán-jaıyn anyqtaý úshin arnaıy komıssııa qurdy. Apattyń mán-jaıy men sebepteri tekserý barysynda anyqtalady», delingen QR Eńbek jáne halyqty áleýmettik qorǵaý mınıstrliginiń baspasóz qyzmeti taratqan habarlamada.
Osy tusta oblystyq eńbek ınspeksııasy oqys oqıǵanyń mán-jaıy jaıly aqparat taratty.
«Saǵat 14:45 shamasynda «NJFZ» JShS qoımasynyń aýmaǵynda konteınerlik sısternadan sary fosfor alý kezinde eki jumysshy fosfordyń shashyraýynan zardap shekti: 1991 jyly týǵan Ormanov D.J. jáne 1997 jyly týǵan Qaldybaı Sh.E. Zardap shekkender Taraz qalalyq kópsalaly aýrýhanasyna jetkizilip, olarǵa alǵashqy medısına kómegi kórsetildi. Osy oqys oqıǵany anyqtaý úshin arnaıy komıssııa quryldy», delingen aqparatta.