Erteń el boıynsha ekpindi jel soǵady

Mamandardyń aıtýynsha, atmosferalyq frontaldy ýchaskelerdiń ótýimen Qazaqstannyń basym bóliginde aýa raıy qubylmaly bolady. Sınoptıkter jańbyr jaýady dep boljap otyr. «Eldiń soltústik-batysynda, shyǵysynda, ońtústik-shyǵystyń taýly aımaqtarynda naızaǵaı oınap, burshaq aralas jańbyr jaýýy múmkin. Tek Qazaqstannyń batysynda kún jaýyn-shashynsyz bolady», delingen «Qazgıdromet» RMK habarlamasynda.

Naqtyraq aıtqanda, el boıynsha ekpindi jel soǵady. Qazaqstannyń soltústik-batysynda túnde jáne tańerteń tuman túsedi.

Astanada kóshpeli bult shyǵady, jaýyn-shashynsyz. Soltústik-shyǵystan 7-12 m/s jel soǵady. Aýa temperatýrasy túnde +14+16°S, kúndiz +28+30°S.

Almatyda kóshpeli bult shyǵady, kúndiz ótkinshi jańbyr jaýady, naızaǵaı oınaıdy. Ońtústik-batystan soǵatyn jeldiń kúshi 3-8, naızaǵaı kezinde ekpini 15-20 m/s bolady. Aýa temperatýrasy túnde +18+20°S, kúndiz +28+30°S.

Shymkentte kóshpeli bult shyǵady, ótkinshi jańbyr jaýady, naızaǵaı oınaıdy. Ońtústik-batystan soǵatyn jeldiń kúshi 8-13, tańerteń jáne kúndiz ekpini 15-20 m/s bolady. Aýa temperatýrasy túnde +19+21°S, kúndiz +31+36°S.