Kenen Ázirbaev atyndaǵy Jambyl oblystyq fılarmonııasy Aýstrııanyń ońtústiginde ornalasqan Fıllah qalasynda ótken «Villacher Kirchtag» atty dástúrli festıvalǵa qatysty.
Festıval sahnasynda Mádenıet salasynyń úzdigi Dastan Kóregenniń jetekshiligindegi «Alataý» folklorlyq ansambli, Mádenıet salasynyń úzdikteri Ońal Azamatova, Janatbek Kádirov jáne Jandos Omarov óner kórsetti. Mádenı baıqaýdy 100 myń kórermen tamashalap, 40-qa jýyq memleketten 3000-ǵa jýyq ónerpaz qatysty.
Qazaqstannyń Aýstrııa Respýblıkasyndaǵy, Slovenııa Respýblıkasyndaǵy Tótenshe jáne ókiletti elshisi, Vena qalasyndaǵy Qazaqstan Respýblıkasynyń halyqaralyq uıymdar janyndaǵy turaqty ókili Álibek Baqaev Jambyl oblysy ákimdiginiń mádenıet, arhıvter jáne qujattama basqarmasynyń basshysy Erlan Júnisbaıǵa, K.Ázirbaev atyndaǵy Jambyl oblystyq fılarmonııasynyń dırektory Seıitqasym Túktibaevqa alǵys bildirip, ónerpazdardy da marapattady.
Sondaı-aq fılarmonııa ónerpazdary 78-dástúrli festıvaldyń jabylýyna arnalǵan «Ulttyq kıimder sherýine» qatysty. Derekterge sensek, mádenı is-sharany 150 myń kórermen tamashalaǵan.
Sherýge kók baıraǵymyzdy jelbiretip, elimiz atynan qatysqan K.Ázirbaev atyndaǵy Jambyl oblystyq fılarmonııasy «Atameken», «О́z elim» jáne halyq ánderi men Ánurandy oryndady.