El fýtbolynda jankúıerlerdiń syn sadaǵyna eń kóp iligetinderdiń aldyńǵy leginde fýtbolshylar tursa, odan keıingi synalatyndardyń qatarynda tóreshilerdiń bar ekeni belgili. Osy rette Qazaqstan fýtbol federasııasy tóreshilik qyzmetiniń sapasy men tóreshilerdiń komandalyq jumysynyń tıimdiligin arttyrýǵa baǵyttalǵan jańa bastamany usynyp otyr.
Endi fýtboldan OLIMPBET-Qazaqstan chempıonatynyń aldaǵy týrlarynan bastap kásibılik pen ádildiktiń jańa standarttaryn aıqyndaıtyn tóreshilerge arnalǵan bonýs júıesi boıynsha syıaqy tóleý baǵdarlamasy engiziledi.
Bul baǵdarlamanyń negizgi maqsaty – alańda qabyldanǵan sheshimderdiń ádildigi men dáldigin qamtamasyz ete otyryp, tóreshiler tobynyń negizgi kórsetkishterin jaqsartý. Baǵalaý júıesi tóreshiler tobynyń durys sheshim qabyldaýynyń birtutas tetigin qalyptastyrýǵa kómektesedi.
Qazaqstan fýtbol federasııasynyń baspasóz qyzmeti taratqan málimetke súıensek, bonýs júıesi boıynsha syıaqy tóleý baǵdarlamasy ár tóreshiniń oıyndarda turaqty túrde alyp júrgen baǵalaý kórsetkishterin tolyqtyrady. Bul jańashyldyq arqyly tóreshiler qyzmetiniń joǵary standarttary belgilenip, ári qaraı ol ashyq yntalandyrý júıesi arqyly retteledi.
Joba tóreshilerdiń kásibı ósýine jańa perspektıvalar ashady jáne olardy komandalyq jumysta joǵary kórsetkishterge qol jetkizýge yntalandyrady. Qazaqstan fýtbol federasııasy bul bastamanyń fýtbol tóreshiligin odan ári damytyp, chempıonattaǵy oıyndardyń sapasyn arttyrýda mańyzdy ról atqaratynyna senimdi.