Prezıdent Ákimshiliginiń Basshysy O.Bektenovtiń tóraǵalyǵymen Qazaqstan Respýblıkasy Prezıdentiniń janyndaǵy Jastar kadr rezervi jónindegi ulttyq komıssııanyń otyrysy ótti, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysynyń tapsyrmasy boıynsha Prezıdenttik jastar kadr rezervine irikteý eki jylda bir ret ótedi. Budan buryn tıisti rezerv 2019 jáne 2021 jyldary jasaqtaldy. Olardyń ishinen 264 rezervshi memlekettik organdar men kvazımemlekettik sektordaǵy ártúrli laýazymdarǵa taǵaıyndaldy. 31 rezervshi saıası laýazymdardy, 6 – «A» korpýsynyń ákimshilik laýazymdaryn atqarady.
Ulttyq komıssııanyń otyrysynda 1 qyrkúıekte bastalyp, bıylǵy jyldyń sońyna deıin jalǵasatyn Prezıdenttik jastar kadr rezervine jańa irikteýdi uıymdastyrý máseleleri talqylandy.
Irikteý sheńberinde kandıdattardyń mátindik jáne sandyq aqparatpen jumys isteý, sıtýasııalyq tapsyrmalardy sheshý qabiletin, sondaı-aq quzyretterin baǵalanady jáne olar birqatar áńgimelesýden ótedi.
Irikteýden sátti ótken adamdar memlekettik qyzmettiń jáne kvazımemlekettik sektordyń jaýapty laýazymdaryna konkýrstan tys taǵaıyndaý quqyǵymen úsh jyl merzimge rezervke alynady.
Sonymen qatar is-shara barysynda Memlekettik qyzmet isteri agenttiginiń tóraǵasy Darhan Jazyqbaev aldaǵy irikteýdi ótkizýge daıyndyq týraly baıandady.
Aıta keteıik, irikteýdi ótkizý tártibi men merzimderi týraly tolyq aqparat Memlekettik qyzmet isteri agenttiginiń saıtynda jarııalanady.