Qorǵanys mınıstrligi armııanyń barlyq aspektisin damytý jáne áskerlerdi tehnıkalyq jaraqtandyrý sharalaryn keshendi túrde júzege asyryp keledi. Avıasııalyq park te jyl saıyn jańa tehnıkamen tolyǵýda. Astana qalasynyń avıabazasyna ıspandyq Airbus Defence and Space kompanııasy shyǵarǵan júk kótergishi ortasha S-295MW áskerı-kólik ushaǵy kelip jetti, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
69 áskerı qyzmetshi jáne 8800 kelige deıin júk tasymaldaýǵa arnalǵan áýe kemesi óz sanatyndaǵy eń senimdi ári únemdilerdiń biri bolyp keletin Pratt & Whitney PW127G shyǵarǵan eki týrbovıntti qozǵaltqyshpen jabdyqtalǵan. S-295MW ushaǵy eń qolaısyz aýa-raıy jaǵdaıynda da tapsyrmalardy oryndaýǵa múmkindik beretin zamanaýı ushýdy basqarýshy júıesimen jáne pılottyq-navıgasııalyq jabdyqtarmen jasaqtalǵan.
Qysqa jáne orta is-qımyl radıýsyndaǵy ushaqtyń artqy jaǵynda pandýsy bar júk kabınasymen jabdyqtalǵan. Áýe kemesi jeke quramdy tasymaldaýǵa, desanttaýǵa jáne júkterdi laqtyrýǵa, áýede baqylaý júrgizýge jáne medısınalyq evakýasııalaýǵa arnalǵan.
«Áskerı avıasııanyń múmkindikterin arttyrý sheńberinde 19132 áskerı bólimine S-295MW jańa áskerı-kóliktik ushaq kelip tústi. Tehnıkalyq sıpattamalary boıynsha bul óz sanatyndaǵy ushaqtardan otyn shyǵyny jaǵynan eń tıimdi, senimdi jáne únemdi ushaqtardyń biri», dep túsindirdi Áýe qorǵanysy kúshteri qarý-jaraq bas basqarmasynyń shtab bastyǵy polkovnık Dmıtrıı Fedorchenko.
Atalǵan úlgidegi ushaqty paıdalaný maqsatynda ushqyshtar men ınjenerlik-tehnıkalyq quram Ispanııanyń Sevılıa qalasyndaǵy Airbus Defence and Space oqý-jattyǵý ortalyǵynda oqytyldy.
Memlekettik-qorǵanys tapsyrysy sheńberinde jasalǵan shartqa sáıkes ushaqty qabyldaý on kún ishinde júrgizilmek. Sodan keıin ol memlekettik áýe kemeleriniń tizilimine engizilip, paıdalanýǵa beriledi.