Abaı kúni merekesi uly aqynnyń týǵan jerinde úsh kúnge ulasqan túrli mádenı is-sharalarmen el esinde qaldy. Sonyń ishinde shoqtyǵy bıigi Abaı oblystyq ákimdiginiń, deneshynyqtyrý jáne sport basqarmasy men Álıhan Bókeıhan jáne Shákárim ýnıversıtetteriniń, túrli deńgeıdegi demeýshi kompanııalar men kásipkerlerdiń qoldaýymen, «El sport» qoǵamdyq birlestiginiń uıymdastyrýymen elimizde tuńǵysh ret ótkizilgen ýltramarafon boldy. Ǵalym ári tanymal marafonshy Ramazan Salyqjanovtyń jetekshiligimen júzege asqan ýltramarafonǵa elimizden jáne shet memleketterden barlyǵy 16 sportshy qatysyp, «Semeı-Jıdebaı-100 mıl» (160 km) jáne «Semeı-Bórili-50 mıl» (80 km) qashyqtyqta baq synady.
«ABAI» halyqaralyq áýejaıynyń aldynan 9 tamyz kúni bastaý alǵan marafon 10 tamyz – Abaı kúninde Jıdebaıdaǵy aqyn kesenesi janynda aıaqtaldy. Qalaı desek te 160 shaqyrymǵa júgirýge ekiniń biri táýekel ete bermeıtini belgili. Degenmen jigerin janyp, namysyn tý etken azamat Nurkeldi Aman esimdi qandasymyz bul qashyqtyqty 15 saǵat 32 mınýt 58 sekýndta artqa tastap, ýltramarafon chempıony atandy. Ol sondaı-aq jarys demeýshileri tikken 500 myń teńge qarjylaı syıaqyny qanjyǵasyna baılady.
Al 80 shaqyrymǵa mejelengen «Semeı-Bórili» baǵytyn betke alǵan marafonshylar arasynan astanalyq áleýmettanýshy ǵalym, professor Asqar Jańabergenovtiń baǵy jandy. Ol bul qashyqtyqty 6 saǵat 23 mınýt 24 sekýndta júgirip ótip, ýltramarafon chempıony atanyp jáne 300 myń teńgege ıe boldy.
Álıhan Bókeıhan ýnıversıtetiniń basshylyǵy da sporttyq is-sharaǵa qoldaý kórsetip, aldyńǵy oryndardan kóringen marafonshylarǵa 100 myń teńge kóleminde júlde usyndy. Ony ýnıversıtet prorektory Azamat Azatuly tabystady. Marafon aıaqtalǵan soń Ramazan Salyqjanovty áńgimege tarttyq.
«Jalpy, bul marafondy uıymdastyrý ıdeıasy «El sport» qoǵamdyq birlestiginiń tarapynan týyndap, onyń júzege asýyna Abaı oblysynyń ákimi Nurlan Uranhaev, oblystyq sport jáne deneshynyqtyrý basqarmasynyń basshysy Erjan Ábilqasymov, oblystyq buqaralyq sporttyq sharalar ótkizý ortalyǵynyń dırektory Nurlan Rahymbaev, ózge de el azamattary jan-jaqty qoldaý kórsetkenin atap ótkim keledi. Marafonda júırikter laıyqty marapattarǵa ıe boldy. Jalpy, osyndaı marafondy túrli serııamen jalǵastyrýdy qolǵa alyp jatyrmyz. «El sport» qoǵamdyq birlestiginiń quramyndaǵy azamattardy aıta ketkenim jón bolar. Birlestikte «Sport jáne qoǵam» ortalyǵynyń basshysy Muhtar Esqalıev, ǵylymı sarapshylar komıssııasynda belgili ǵalymdar jáne birneshe sporttyq klýbtardyń basshylary bar. Bul respýblıkalyq qoǵamdyq birlestik bıyl mamyr aıynda quryldy. Ári qaraı sporttyq baǵyttaǵy jumystarymyzdy jalǵastyra beretin bolamyz», deıdi «El sport» qoǵamdyq birlestiginiń basshysy Ramazan Sattaruly.
Abaı oblysy