Bul týraly Jetisý oblysynyń prokýratýrasy málimdedi, dep habarlaıdy Egemen.kz.
11 tamyzda jýrnalıst Sandýǵash Dúısenova qamaýǵa alynǵany týraly belgili boldy. Oǵan «Jeke ómirge qolsuqpaý jáne derbes derek pen olardy qorǵaý týraly zańnamany buzý» (147-bap) baby boıynsha aıyp taǵylǵan edi.
Al keshe, 14 tamyzda Dúısenova Jetisý oblysynyń prokýrory Madııar Basshybaevpen qylmystyq jaýapkershilikke tartý máselesi boıynsha jeke qabyldandy.
Onyń dálelderin eskere otyryp, prokýratýra zertteý úshin qylmystyq isti suratyp aldy.
«Qylmystyq kodekstiń 147-babynyń 5-bóligine sáıkes qylmystyq jaýaptylyq buqaralyq aqparat quraldarynda derbes derekterdi zańsyz taratý nátıjesinde adamnyń quqyqtary men zańdy múddelerine eleýli zııan keltirilgen jaǵdaıda týyndaıdy. Alaıda, tergeý organy zańnamada kózdelgen tergeý merziminde jábirlenýshige eleýli zııan keltirilgenin rastaıtyn jetkilikti naqty derekterdi anyqtaǵan joq», delingen habarlamada.
Osyǵan baılanysty Taldyqorǵan qalasy prokýrorynyń qaýlysymen jýrnalıske qatysty qozǵalǵan qylmystyq is toqtatyldy.