«Egemen TV» Youtube arnasyna qazaqtyń tuńǵysh bard ánshisi Tabyldy Dosymovtyń uly Abyl Tabyldyuly suhbat berdi. Suhbat barysynda bard janry týraly, áıgili «Sáıgúlik» áni týraly áńgime órbidi, dep habarlaıdy Egemen.kz.
Abyl Tabyldyulynyń aıtýynsha, bard janry - sózin, áýenin ózi jazyp, ony ózi oryndaý jáne mindetti túrde gıtara aspabymen súıemeldeý. Bardtyń ereksheligi osynda. Bard janrynyń eldik, qoǵamdyq máselelerdi qozǵaı alatyn tustary da bar.
Tabyldy Dosymovtyń stýdenttik shaǵy Jeltoqsan oqıǵasy bolǵan kezeńge tuspa-tus kelgeni málim. Sol oqıǵadan keıin akademııalyq demalys alyp, aýylǵa qaıtqan. Sol ýaqytta «Jeltoqsan jyry» degen án shyqqan. «Qazaq edim degenshe» ániniń shyǵýyna da sebep bolǵan oqıǵalardyń biri - Jeltoqsan oqıǵasy. Jeltoqsan týraly kóptegen poezııalyq óleńderi de bar. Sol kezeńde shyqqan ánniń biri hám biregeıi Svetqalı Nurjanovtyń sózine jazylǵan «Sáıgúlik» áni.
-«Sáıgúlik» áni jylqyǵa, tulparǵa arnalǵan eken dep kóbi qatelesedi. Svetqalı Nurjan Táýelsizdigimizdi ańsap jazǵan. Ákemniń joldastarynyń aıtýynsha, «Sáıgúlik» áni Esenǵalı Raýshanovtyń sózine jazylǵan «Qara baýyr qasqaldaq» áni sekildi jeltoqsan oqıǵasynyń aldyńǵy shebinde oryndalǵan án eken. Demek, ol uran bolyp shyrqalǵan ánderdiń biri bolǵan», dedi Abyl Dosymov.
Onyń aıtýynsha, Reseıde bard janryndaǵy ándi estradaǵa salyp oryndamaıdy, óıtkeni janrǵa degen qurmet bar.
«Bizdiń elde bard janryndaǵy ánderdi estradaǵa salady, árıne, estradaǵa salýǵa qarsy emespiz, biraq ákemniń ánderiniń stıli, tabıǵaty joǵalyp ketpese eken deımiz. Burynnan aıtyp júrmiz, maqsatymyz - áke bolmysyn joǵaltyp almaý, sol úshin qyzmet etip kele jatyrmyz», deıdi Abyl Tabyldyuly.