Bul kúnderi Qazaqstan astanasy tennısten ATP sanatyndaǵy eń iri týrnırlerdiń birin ótkizýge daıyndalyp jatyr. Álemdik deńgeıdegi jarysqa jer-jahannyń birqatar tanymal tennısshisi qatysady dep josparlanǵan, dep habarlaıdy Egemen.kz.
Atap aıtar bolsaq, qazirdiń ózinde elimizdegi baıraqty dodaǵa ATP reıtıngte 26-satyǵa jaıǵasqan elimizdiń birinshi raketkasy, jýyrda ǵana Germanııanyń Galle qalasynda máresine jetken ATR 500 týrnıriniń jeńimpazy Aleksandr Býblık, «Úlken dýlyǵa» sanatyndaǵy eń iri úsh týrnırdiń jeńimpazy, Olımpıada chempıony, ATP sanatyndaǵy 19 týrnırdiń jeńimpazy, «Devıs kýboginiń» ıegeri, álemniń burynǵy úshinshi raketkasy shveısarııalyq Sten Vavrınka, birqatar iri jarystyń jeńimpazy, álemniń eks úshinshi raketkasy aýstrııalyq Domınık Tım, jastar arasyndaǵy «Úlken dýlyǵa» týrnıriniń jeńimpazy, jastar arasyndaǵy álemniń burynǵy birinshi raketkasy, qazirgi tańda eresekter arasyndaǵy reıtıngte 32-orynda turǵan amerıkalyq Sebastıan Korda qatysatyndaryn málimdedi.
Aıta keteıik, elordadaǵy Beeline Arena Ulttyq tennıs ortalyǵynda ótetin ATP 250 sanatyndaǵy ASTANA OPEN týrnıri bıyl úshinshi márte uıymdastyrylmaq. Bul týrnır buǵan deıin elimizde 2020 jáne 2021 jyldary ótkizilse, byltyr Qazaqstan tennıs tarıhynda alǵash ret ATR 500 serııaly jarystyń jalaýy jelbiregen edi.
Júlde qory 1 017 860 AQSh dollaryn quraıtyn týrnır elordada 26 qyrkúıek pen 3 qazan aralyǵynda ótedi.