Memleket basshysy Almaty qalasyn damytý máseleleri jóninde keńes ótkizdi, dep habarlaıdy Egemen.kz Aqordanyń baspasóz qyzmetine silteme jasap.
Jıyndy ashqan Memleket basshysy byltyr kúzde Almaty jurtshylyǵymen kezdesý barysynda qalany damytýdyń basty baǵyttary aıqyndalǵanyn atap ótip, nátıjesinde Almatyny damytýdyń 2030 jylǵa deıingi baǵdarlamasy qabyldanyp, shahardyń 2040 jylǵa deıingi Bas jospary bekitilgenin aıtty.– Aldaǵy 20 jylda Almaty halqynyń sany 3 mıllıonǵa jýyqtaıdy degen boljam bar. Bolashaqta qala ishindegi bes aýmaq ortalyq retinde damıdy. Sonda ortalyqtaǵy qazirgi ahýal birshama jeńildep, barlyq aýdanǵa birdeı salmaq túsedi. Sońǵy 10 jylda qala óte jyldam ári retsiz ósti. Almatynyń aýmaǵy eki eseden astam keńeıdi. Biraq ınfraqurylymnyń damýy ár jerde ártúrli bolyp otyr. Qalada turǵyndar sany ortasha alǵanda jyl saıyn 70 myń adamǵa kóbeıip keledi. Jumysqa, sabaqqa barý úshin irgeles eldi mekenderden kún saıyn 500 myń adam Almatyǵa kelip ketedi. Mundaı túıtkilderdi ýaqtyly anyqtap, der kezinde sheship otyrý qajet, – dedi Memleket basshysy.
Keńes barysynda qalanyń kommýnaldyq, jol jáne áleýmettik ınfraqurylymyn damytý, sondaı-aq bilim, ekologııa jáne medısına salalarynda qordalanyp qalǵan problemalardy sheshý joldary talqylandy.
Sonymen qatar jıyn barysynda Almaty qalasynyń ákimi Erbolat Dosaev, Premer-mınıstrdiń birinshi orynbasary Roman Sklıar, Premer-mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova sóz sóıledi.