Jurtshylyqqa berilgen ýáde oryndalyp keledi

BAQ ókilderimen kezdesý barysynda oblystyq «Amanat» partııasy depý­tattyq fraksııasynyń atqarǵan ju­mys­ta­ry, saılaýaldy baǵdarlamanyń oryndalýy jaıy baıandaldy. Aımaqta atalǵan partııanyń 10 fılıaly (1 óńirlik, 9 aýmaqtyq), 137 bastaýysh partııa uıymy jumys isteıdi, olardyń quramynda 23 708 partııa múshesi bar.

Búgingi tańda óńirlik Jol kartasyna partııanyń aldyn ala mindettemelerin iske asyrýǵa baǵyttalǵan 157 is-shara engizilgen. Shaǵangúl Aldamjarqyzy fraksııanyń árbir múshesi Jol kartanyń oryndalýyn jiti baqylaýyna alǵanyn atap ótti.

«Basty maqsatymyz – «Amanat» par­tııa­­synyń 2023-2027 jyldarǵa arnal­ǵan «Halyqpen birge!» saılaýaldy baǵ­d­ar­lamasyn júzege asyrý. Baǵdar­la­maǵa túıtkildi máselelerdi sheshetin, halyqtyń jaǵdaıyn jaqsartatyn júıeli is-sharalar jospary kirdi. Abaı oblysy boıynsha Saılaýaldy baǵdarlamanyń oryndalýyna júrgizilgen taldaýǵa sáı­kes, 6 aıda 157 is-sharanyń ishinde – 4 (3%) oryndaldy, oryndalý satysynda – 92 (58,5%), oryndalý merzimi áli kelmegen – 61 (39%) kórsetti. Atap aıtqanda, Semeı qalasynyń Qaınar aýylynda 200 orynǵa arnalǵan deneshynyqtyrý-saýyqtyrý kesheni, Semeı qalasynda 150 oryndyq múgedekterge arnalǵan ońaltý ortalyǵy engizildi. Sonymen qatar oblys ortalyǵynda fotovıdeofıksasııa jáne beıneanalıtıka júıesi qurylyp, 1 551 beınekamera ornatyldy. Kókpekti aýdanyndaǵy «Kókjaıyq aýylyndaǵy sý jelileriniń qurylysy» nysany engizildi», deıdi oblystyq máslıhat depýtaty Sh.Aldamjarqyzy.

Búginde iske asyp jatqan birqatar partııalyq joba baryn da ataı ketken jón. «Amanat» partııasynyń «Baqytty otbasy», «Ardagerlerdi ardaqtaıyq», «Kedergisiz keleshek», «Ulttyq mura», «Eńbek adamy», «Halyqqa kómek» jáne taǵy da basqa jobalar ret-retimen oryndalyp keledi. Mysaly, erekshe qajettilikteri bar adamdardy jumyspen qamtý máselesin sheshý úshin «Kedergisiz keleshek» jobasy aıasynda «Jastar praktıkasy» jáne «Alǵashqy jumys orny» baǵdarlamalary boıynsha JOO túlekteri jumysqa ornalastyryldy, áleýmettik jáne kólik ınfraqurylymy nysandarynyń qoljetimdiligine partııa­lyq monıtorıng júrgiziledi.

«Qazirgi ýaqytta partııa depýtattary partııanyń Ortalyq apparaty men óńir­lik fılıaldarynyń qyzmetkerleri, basta­ýysh partııa uıymdarynyń múshe­le­rimen birlese otyryp, «Balalardy mektepke daıarlaıyq!» aksııasyna belsene qatysyp keledi. Bul aksııa «Baqytty otbasy» partııalyq jobasy aıasynda osymen 13 márte ótkizilip otyr. Aksııanyń maqsaty – kópbalaly jáne az qamtylǵan otbasylardaǵy balalardy jańa oqý jylyna daıyndaýǵa kómektesý. Is-shara aıasynda urpaq bolashaǵyna beıjaı qaraı almaıtyn azamattar oqýshylarǵa mektep formasy, oqýlyqtar men qajetti quraldar salynǵan rıýkzaktar tartý etti», deıdi Shaǵangúl Aldamjarqyzy.