Alasa boıly, aqsary júzdi balaqaı bastaýysh synypta oqyp júrgen kezinen-aq ereksheligimen kózge tústi. Mektepte jaqsy oqýmen qatar qazaqsha kúreske qatysyp, talaı jarystardyń júldegeri atandy. Sport pen oqýdy sabaqtastyryp, tarazy basyn teń ustaǵan Ádilet ortasynan oq boıy ozyq turatyn. Talaby taýdaı órenniń sol shaqta-aq sırk kolledjine barǵysy keletinin anasy jıi aıtatyn.
Bilim ordasyndaǵy merekelik sharalarda bıshiler tobynyń quramynan jıi kórinetin Ádilettiń dene bitiminiń ıilgishtigi, úlken ónerge degen ıkemdiligin anyq ańǵartyp turatyn-dy. Boıyndaǵy erte tanylǵan bıshilik qasıeti qazaq sırk óneriniń kógine kóterilip, shyńyna shyǵýyna alǵashqy baspaldaq bolǵandaı.
Ádilettiń eki jasynda ákesi dúnıeden ótip, anasy Sveta baýyryndaǵy eki ul, bir qyzdy «qanattyǵa qaqtyrmaı, tumsyqtyǵa shoqyttyrmaı», oqyp-toqýyna bar kúsh-qaıratyn jumyldyrady. Balalarynyń qamymen Raıymbek aýdanynan Almatyǵa kelip, páter jaǵalap, kún-tún demeı jumys istep qarabaıyr tirshilik keshedi. Úıdiń kenjesi bolsa da, erkelikke boı aldyrmaı, óz betinshe izdenip, únemi eńbektenýdi ádetke aınaldyrǵan Ádilet 9-synyptan soń ózi armandaǵan Júsipbek Elebekov atyndaǵy estrada sırk kolledjine oqýǵa túsip, 2016-2020 jyldar arasynda sırk óneriniń qyr-syryn meńgerip shyqty. Tegeýrindi talant sırk ónerinde ózindik oıyn órnegin quryp, kórkem gımnastıkanyń sheberine aınalýdy maqsat tutty. Maqsat óńge, arman aqıqatqa aınaldy, eńbek jandy degen osy emes pe?
– Sırk óneriniń qudiretin sózben aıtyp jetkizý múmkin emes. Onyń ár sáti qaýip-qaterge toly, bir ádisti durys ıgere almasaq qulap, jaraqat alatyn kezder bolady. Sondyqtan múmkindiginshe qatelespeýge kúsh salamyz. Sırk manejindegi jeńis pen jetistik tek eren eńbekpen ǵana keledi, únemi jattyǵýmen júremiz. Eń qyzyǵy, gastroldik saparlarda jańa dostar taýyp, sheteldiń mádenıetimen tanysamyz. Bul shyǵarmashylyǵymyzben qosa rýhanı ósýimizge de sebin tıgizedi. Sonyń arqasynda aǵylshyn tilin meńgerýime múmkindik týdy. Bizdiń basty ustanymymyz – ár kórermenniń kóńilinen shyǵa bilý. Halyqtyń ystyq yqylasyna bólenýden asqan qýanysh joq, – deıdi Ádilet.
Kórkem gımnastıka sheberi Adlet Tıkanov jetekshilik etetin «Hassak» komandasynyń quramynda óner kórsetetin Ádilet Dúńgenbaı búginde qulashyn keńge jaıyp, óneriniń jańa qyrlaryn ashýǵa kúsh salyp keledi. Jarqyn Borazdaev, Jalǵas Qaınarbaı, Mahmýd Almas, Dastan Baqytuly, Nurym Saǵymhandarmen birge qazaq sırk óneriniń órkendeýine eńbek etip júr. «Tomırıs» atty ujymdyq qoıylymdary arqyly sırk ónerine sony lep ákelgeni kópshilikke málim. Nátıjesinde, byltyr Majarstannyń Býdapesht qalasynda ótken halyqaralyq sırk festıvaliniń laýreaty atandy. Sondaı-aq Ispanııada ótken 10-halyqaralyq sırk mereıtoıynyń laýreaty atanǵan óner ujymy Fransııaǵa shaqyrtý alǵandyǵyn aıryqsha ataǵymyz keledi.
Gastroldik saparlarmen elimizdiń sırk ónerin álemniń ár qıyryna, atap aıtsaq, Shvesarııa, Majarstan, Ispanııa, Portýgalııa, Qyrǵyzstan men Reseı memleketterine tanytqan talantty jastar keleshekte tórtkúl dúnıege tanymal «Monte Karlo» sırk festıvaline qatysyp, júldeli orynnan kórinýdi maqsat etip otyr.
Kórermenniń tańdaıyn qaqtyrar sıqyrly sırk óneriniń jas býyny bıyl Almaty qalasynda ótken «Almaty Sirkus Festival» atty halyqaralyq sırk festıvalinde óner kórsetti. On bes elden arnaıy kelgen sırk ónerpazdarynyń ekvılıbrıster, akrobattar, arqanmen júrýshiler, saıqymazaqtar men jonglerler janry sarapqa salynǵan festıvalda «Hassak» óner ujymy gımnastıka janry boıynsha júldeli ekinshi oryndy ıelenip, mereıi asty. Osylaısha, óner sańlaqtary aldaǵy qyrkúıek aıynda Peterbýrgte ótetin «Bez granıs» atty sırk óneriniń festıvaline shaqyrtý alǵan bolatyn.
Mine, búgingi sırk óneriniń jaryq juldyzyna aınalǵan Ádilet Dúńgenbaı bastaǵan ónerpazdar aldaǵy halyqaralyq sırk festıvaline daıarlyqtaryn bastap ta ketti.
Almaty oblysy