Qyzylordada úı qurylysy kombınaty ashyldy. Osyǵan oraı uıymdastyrylǵan saltanatty is-sharada oblys ákimi Nurlybek Nálibaev jańa óndiris óńir damýyna lep qosatynyn atap ótti.
Kombınat eden, jol plıtasy, irgetas bloktary, mańdaısha, taspaly irgetas, baspaldaq sııaqty ónimder shyǵarady. Saǵatyna 80 tekshe metr taýarly beton, kúnine 120 tekshe metr temir-beton buıymdaryn óndiretin kásiporynda 100-ge jýyq jańa jumys orny ashylyp otyr.
– Jańa zaýyt aımaqtaǵy qurylys salasyn damytyp, turǵyn úı jáne áleýmettik ınfraqurylym qurylysy kólemin keńeıtýge jol ashady. Eń bastysy, bul bizge qurylys shyǵyndaryn edáýir azaıtýǵa, ımportqa táýeldilikti tómendetýge, sondaı-aq kapıtaldyń shetelderge ketýin shekteýge múmkindik beredi, – dedi aımaq basshysy.
Memlekettik qoldaý nátıjesinde bıyl oblys aýmaǵynda 8,8 mlrd teńgege 26 turǵyn úıdiń jáne 46 mlrd teńgege 62 áleýmettik nysannyń qurylysy júrgizilip jatyr. Keıingi 3 jylda turǵyn úı qurylysynyń kólemi 112 paıyzǵa ósip, 3 myńnan asa adam jańa páterge kirdi. Osy jyly 692,3 myń sharshy metr turǵyn úıdi qoldanysqa berý josparlanyp otyr.
Qyzylorda