Memleket basshysynyń tapsyrmasy boıynsha qolǵa alynǵan «Jaıly mektep» jobasy Astanada belsendi júzege asyryla bastady. Bul ulttyq joba aıasynda elordada 24 mektep salynyp, bilim berý salasynyń kókjıegin keńeıtpek.
Jańa formattaǵy oqý oryndary eki aýysymda 90 myńǵa jýyq oqýshyǵa arnalǵan oryn ashýǵa múmkindik beredi. Máselen, 24 mekteptiń 15-i qarqyndy damyp kele jatqan Nura men Esil aýdandarynda ornalasady. Sondaı-aq qalanyń eldi mekenderinde de jaıly mektepter boı kóteredi.
Qazirgi ýaqytta 15 jaıly mekteptiń qurylysy bastalyp jatyr. Osy oraıda Astana ákimi Jeńis Qasymbek pen Samruk-Kazyna Construction basqarma tóraǵasy Máýlen Aımanbetov mektepterdiń jobalarymen, qurylys jumysynyń daıyndyq barysymen tanysty. Qazirgi ýaqytta jer ýchaskelerin daıyndaý boıynsha jumys júrip jatyr. Iаǵnı qorshaýlar turǵyzý, ınjenerlik-geologııalyq izdestirý, qadalardy biteý, qurylys tehnıkasyn jumyldyrý, t.b. jumystar.
Sonymen qatar J.Qasymbek ózge de birqatar memlekettik mekteptiń qurylysymen tanysty. Bul qatarda Turan dańǵyly men №24 kósheniń, Qarasaı batyr men Bulanty, Kókseńgir kósheleriniń qıylysyndaǵy mektepter, sondaı-aq qazirgi №17, №27 mektepterdiń janyndaǵy jańa ǵımarattar bar. Qazirgi ýaqytta 14 mekteptiń qurylysy júrip jatyr, onyń 11-i jańa oqý jyly ishinde ashylady. Mektepterdiń qurylysy jańa aýdandarda da, qalanyń oń jaǵalaýynda da, eldi mekenderde de júrgizilý ústinde. Olardyń bir bóligi apatty jaǵdaıdaǵy mektepterdi almastyrady.
Buǵan qosa elordada 67 642 balany qamtıtyn 505 memlekettik, jeke jáne vedomstvolyq mektepke deıingi uıymdar jumys isteıtinin atap ótken jón. Bul rette qalalyq Bilim basqarmasynyń basshysy Qasymhan Senǵazyev balabaqshalardaǵy oryndardyń sany týraly málimetterdi alǵa tartty.
Onyń aıtýynsha, búgingi tańda «Indıgo» elektrondy portalynda kezekke 60 971 mektep jasyna deıingi bala tirkelgen, onyń ishinde eki jastan alty jasqa deıingi balalar sany – 41 818.
Sondaı-aq memlekettik bilim berý tapsyrysyn jeke balabaqshalarda ornalastyrýǵa 10 317 oryn qarastyrylǵan. Onyń ishinde qańtardan sáýirge deıin memlekettik tapsyrys 8 957 oryndyq 200 jekemenshik mektepke deıingi uıymda ornalastyryldy. Bıyl qyrkúıek aıynda qalǵan 1 360 orynǵa konkýrs ótkizý josparlanǵan.
«Bıyl jumys istep turǵan 500 oryndyq mektepke deıingi uıymnyń janynan turǵyn úı keshenderiniń birinshi qabattarynda qosymsha korpýstar ashý josparlanyp otyr. 2023 jyly 17 tamyzdan bastap Astana qalasynyń mektepke deıingi uıymdarynyń toptaryn jańa 2023-2024 oqý jylyna jasaqtaý aıaqtalady. Budan ári oqý jyly ishinde kún saıyn jasaqtaý oryndardy bosatý kezinde júzege asyrylady», dedi Q.Senǵazyev.
«Indıgo» portalynyń málimetinshe, astanalyqtar balabaqshaǵa 22 190 joldama aldy, onyń 13 157-si – memlekettik.
Qyrkúıek aıynan bastap halyqtyń áleýmettik osal toptarynan shyqqan balalar Astananyń balabaqshalarynda tegin tamaqpen qamtamasyz etiledi. Sonymen qatar jańa oqý jylynyń basynda mektepke deıingi mekemeler tárbıeshileriniń jalaqysy 30%-ǵa ósedi.