Bıyl elordada 3 754 pedagog pen 42 mektep dırektory biliktilikti arttyrý kýrstarynan ótti, dep habarlaıdy Egemen.kz qala ákimdiginiń resmı saıtyna silteme jasap.
Ákimdiktiń málimetinshe, bıyl tek qańtar-tamyz aralyǵynda 3 754 pedagog pen 42 mektep dırektory biliktilikti arttyrý kýrstarynan ótken.
«Myń kóshbasshy» respýblıkalyq kadr rezervine elordanyń 20 mektep dırektorynyń orynbasary enip otyr. Sonymen qatar ótken oqý jylynda 30 mektep dırektorynyń orynbasary qatarynan kadrlyq rezerv qalyptastyrylǵan. Olar qazan, qarasha aılarynda MBI baǵdarlamasy boıynsha oqytylady.
Jyl boıy elordanyń 200-den astam mektep basshysy men pedagogteri Sıngapýr, Japonııa, Grýzııa, Fınlıandııa memleketteriniń oqý oryndarynda halyqaralyq tájirıbe almasyp, tıimdi ári qolaıly komponentterdi mektepterdiń oqý-tárbıe prosesimen sabaqtastyrý maqsatynda taǵylymdamadan ótti. Bul tájirıbe jańa oqý jylynda da jalǵasyn tabady.